Falal dembiyeedka Koonfur Afrika oo hoos u dhacay xayiraadda korona awgeed

Warbixin rasmi ah oo ay soo saartay xukuumadu ayaa muujisay in falal dembiyeedku ay dalka Koonfur Afrika hoos u dhaceen 40% saddexdii bilood ee dalku ku jiray xayiraadda.

Wasiirka booliska ayaa sheegay in noocyada falal dembiyeedka dhamaantood ay hoos u dhaceen intii u dhaxaysay Abriil iyo Juun, waxaana ka mid ah falalkaa yaraaday kufsiga iyo guryaha la gubo.

Wuxuu intaa ku daray in xeerkii lagu mamnuucay khamriga ee muranku ka dhashay intii xayiraadda ka hortagga fayraska korona uu gacan ka geystay arintaas, laakiin ay kordheen weerarrada dhaca ah ee lagu qaado dukaamada iibiya khamriga.

Maxaad kala socotaa dalka kaalinta koowaad qaarada Afrika kaga jira Feyriska Corona?

Laamiyada Koonfur Afrika oo ay libaaxyo ku laafyoonayaan

Koonfur Afrika waxay ka mid tahay dalalka ugu falal dembiyeedka badan dunida, waxaana sidoo kale laga helay kala badh tirada dadka uu ku dhacay cudurka Covid-19 qaaradda Afrika.

In ka badan 500,000 oo qof ayuu ku dhacay cudurku waxaana u dhintay 11,000 oo qof, in kasta oo tifaftiraha arimaha Afrika ee BBC-da Mary Harper, sheegtay in ay sababtu noqon karto habka baadhitaanka dalkaas oo ah mid si sax ah natiijada u soo saara.

Wasiirka booliska, Bheki Cele, ayaa Jimcihii u sheegay warfidiyeenka in warbixintu "muujinayso sawir aan hore loo arag oo wanaagsan oo aad moodo in falal dembiyeedkii fasax ka galeen Koonfur Afrika".

Wuxuu sheegay in "tirakoobku muujinayo in ay dhamaan falal dembiyeedku aad hoos ugu dhaceen marka la barbar dhigo mudadaas oo kale sannadkii hore siday ahaayeen."

Waxaanu intaa ku daray in ay "hoos u dhaceen falal dembiyeedka kufsigu 40% saddexdii bilood ee u dambeeyey".

Waxa sidoo kale hoos u dhacay falal dembiyeedka boobka ah iyo jabsashada guryaha oo ay ku jiraan guryaha la gubo oo iyaguna hoos u dhacay 29%.

Bishii Abriil markii xayiraadda dalka lagu soo rogay, ayaa Cele wuxuu digniin uu bixiyey ku sheegay in boolisku "baabiin doonaan goobaha khamriga sida sharci darrada ah loogu iibiyo".

Hase yeeshee wasiirka booliska waxa lagu eedeeyey inuu dhiirigeliyey in boolisku ciqaabaan dadka ay ku qabtaan iyaga oo khamri ku cabaya goobaha la isugu yimaad, ilaa xataa eedaha qaarkood tibaaxeen in ay boolisku nin ay ku dhex garaaceen beertiisa qudha ka jareen.

Koonfur Afrika oo 70 kun oo askari u diyaarisay in ay dadka guryaha ku celiyaan

Ganacsatada makhaayadaha iyo baararka khamriga ayaa sidoo kale ka mudaharaaday mamnuucidda khamirga waxaanay sheegeen in amarkaasi dilayo ganacsigooda.

Bishii hore ayaa booliska Koonfur Afrika soo bandhigay warbixin tirokoob guud ah oo ku saabsan falal dembiyeedyada ka dhacay dalka sannadkii 2019/2020.

Sannadkii hore wadarta guud ee ah falalka dhaca baabuurta iyo meheradaha ganacsiga ayaa ka badnayd intii sannadkii ka horeeyey dhacday.

Sidoo kale waxa badnaa falal dembiyeedka kufsiga, dadka iyaga oo sakhraansan gawaadhida wada iyo sidoo kale haysashada hubka sharci darrada ah.