TOOS, Hadalka Turkiga ee ka careysiiyay Somaliland

Tebin toos ah

1. 6 Saacadood ka hor“Xasan Sheekh Maxamuud awood uma laha inuu idin keeno halkan” Somaliland oo si adag ugu jawaabtay Turkiga

   

   Xigashada Sawirka, SOCIAL

   Wasiirka madaxtooyada ee Jamhuuriyadda Iskeed ugu Dhawaaqday Madaxbannaanida ee Somaliland Khadar Xuseen Cabdi oo goor dhow qoraal soo dhigay bartiisa X ayaa ka hadlay warkii kasoo baxay dowladda Turkiga ee ku aaddanaa aqoonsiga Israa'iil ee Somaliland.

   “Waxaa wax lala yaabo ah in 35 sano kadib oo ay iska indha tirayeen dadkeenna iyo qadiyadeenna, in dawlada Turkigu si lama filaan ah u ogaatay muhiimadda istiraatijiyadeed ee Somaliland. Waxaa ka sii niyad jab badan in garashadani ay isu rogtay cadaawad. Run fudud ayaa ah mid taagnaaneysa: kani waa dhulkeenna. HSM sharci iyo awood midna uma laha inuu halkan idin keeno-laakiin waxaanu leennahay sharci iyo awood aanu ku martiqaadno saaxiibadeenna” ayuu ku yiri qoraalkiisa barta X.

   Hadalka wasiirka ayaa yimid maalin kadib markii wasiirka arrimaha dibada Turkiga Hakan Fidan oo ka hadlayay arrimo badan oo caalamka uu sheegay inay tahay nasiib darro weyn oo ku dhacday Somaliland isagoo kala jeeday aqoonsiga ay israa'iil ka heshay.

   Isaga oo ka hadlaya ayuu yiri: “waxaan u arkaa aqoonsiga Israa'iill ee Somaliland inuu yahay musiibo ugu weyn oo ku dhici karta Somaliland. Maxaa noqon kara musiibo ka weyn tan oo ku timaadda bulsho Muslim ah, ama hay’ad siyaasadeed oo Muslim ah? Qofna ma aqoonsana, Israa'iil ayaana ku aqoonsatay. Ma aha sababta aad tahay, laakiin sababtoo ah waxaad u adeegaysaa ujeedo xun, siyaasadooda gobolka ah. Haddii Ilaah kuu oggolaaday arrintan, waa ceeb iyo ciqaab weyn dhab ahaantii. Tani waxay ka dhigan tahay in qofku u baahan yahay inuu is xakameeyo.” Ayuu yiri.

2. 8 Saacadood ka horHadalka Turkiga ee ka careysiiyay Somaliland

   

   Xigashada Sawirka, Social

   Wasiirka arrimaha dibada Turkiga Hakan Fidan oo ka hadlayay arrimo badan oo caalamka ayaa nasiib daro weyn oo ku dhacday Somaliland ku tilmaamay aqoonsiga ay israa'iil siisay jamhuuriyadda iskeeda madaxbanaanida ugu dhawaaqday.

   Isaga oo ka hadlaya ayuu yiri “Waxaan u arkaa aqoonsiga Israa'iill ee Somaliland inuu yahay musiibo ugu weyn oo ku dhici karta Somaliland. Maxaa noqon kara musiibo ka weyn tan oo ku timaada bulsho Muslim ah, ama hay’ad siyaasadeed oo Muslim ah? Qofna ma aqoonsana, Israa'iil ayaana ku aqoonsatay. Ma aha sababta aad tahay, laakiin sababtoo ah waxaad u adeegaysaa ujeedo xun, siyaasadooda gobolka ah. Haddii Ilaah kuu oggolaaday arrintan, waa ceeb iyo ciqaab weyn dhab ahaantii. Tani waxay ka dhigan tahay in qofku u baahan yahay inuu is xakameeyo.”

3. 10 Jannaayo 2026Taliska Booliska Somaliland oo muwaadiniintooda safraya ugu baaqay inay sitaan kaarkooda dhalashada

   

   Xigashada Sawirka, Barta bulshada

   Taliska booliska Somaliland oo muwaadiniinta deegaankeeda ku amartay inay qaataan kaarkooda dhalashada, gaar ahaan kuwa u kala safraya gudaha Somaliland

   Sugida amniga ayaa talisku sheegay in loo qaadayo talaabadan, iyaga oo ka codsaday shacabka in ay kala shaqeeyaan amaanka

4. 10 Jannaayo 2026Dhakhaatiirta Iiran oo sheegay in isbitaalladu ay aad u buux-dhaafeen, iyada oo mudaaharaadyadu ay galayaan toddobaadkoodii labaad.

   

   Xigashada Sawirka, Reuters

   Iyada oo mudaharaadyada ka socda Iiran ay galeen toddobaadkoodii labaad, isla markaana mas’uuliyiinta dowlada ay soo saareen digniino loo diray dibadbaxayaasha, dhakhtar iyo kalkaaliye caafimaad oo ka shaqeeya laba isbitaal ayaa BBC-da u sheegay in xarumahooda caafimaad ay ka buux dhaafiyeen dhaawacyo.

   Mid ka mid ah dhakhaatiirta ayaa sheegay in isbitaal indhaha lagu daaweeyo oo ku yaalla Tehran uu galay xaalad degdeg ah, halka BBC-da ay sidoo kale heshay farriin ka timid kalkaaliye caafimaad oo ka shaqeeya isbitaal kale, kaas oo sheegay in aysan haysan dhakhaatiir qalliin oo ku filan si ay ula tacaalaan tirada badan ee bukaanada la keenayo isbitaalka.

   Jimcihii, Madaxweynaha Mareykanka Donald Trump ayaa sheegay in Iiran ay ku jirto “dhibaato weyn”, isaga oo yiri “Way fiicnaan lahayd inaadan bilaabin rasaas ridid, sababtoo ah annaguna waan bilaabi doonnaa rasaas ridid.”

   Iiran, warqad ay u dirtay Golaha Ammaanka ee Qaramada Midoobay, ayay Mareykanka ku eedeysay inuu mudaharaadyada u beddelay waxa ay ku tilmaantay “falal rabshado leh oo lagu wiiqayo amniga iyo geysashada burbur ballaaran.”

5. 10 Jannaayo 2026Trump oo ka digay weerar kale uu ku qaado Nigeria haddii la sii wado dilka Masiixiyiinta

   

   Xigashada Sawirka, Reuters

   Madaxweynaha Mareykanka Donald Trump ayaa ka digay inuu amri karo weerarro kale oo cirka oo uu ku qaado Nigeria, haddii la sii wado dilka Masiixiyiinta ee ka dhacaya dalka dhaca Galbeedka Afrika.

   Wareysi uu siiyay wargeyska New York Times, Trump ayaa la weydiiyay in weerarradii Maalinta Kirismaska ee ka dhacay gobolka Sokoto ee waqooyiga Nigeria ee lagu bartilmaameedsaday kooxaha islaamiyiinta ay ahaayeen qayb ka mid ah olole militari oo ballaaran.

   “Waxaan jeclaan lahaa in uu noqdo hal mar oo kaliya. Laakiin haddii ay sii wadaan dilka Masiixiyiinta, wuxuu noqon doonaa weerar joogto ah,” ayuu yiri.

   Dowladda Nigeria ayaa horay u diiday eedeymihii Trump ee ahaa in ay ku guul-darreysatay ka ilaalinta weerarrada kooxaha jihaadiga ee ka dhanka ah masiixiyiinta , iyada oo sheegtay in “Muslimiin, Masiixiyiin iyo dadka aan diin lahayn” dhammaantood la beegsanayo.

6. 10 Jannaayo 2026Dadka reer Greenland oo dareemaya cabsi iyo welwel ay ka qaadeen jaahwareerka ay dhexda u galeen

   

   Xoghayaha Arrimaha Dibadda ee Maraykanka, Marco Rubio ayaa la kulmi doona mas’uuliyiin Denmarka toddobaadka soo socda si ay uga wada hadlaan mustaqbalka Greenland — oo ah dhul si iskiis ah u maamula arrimihiisa balse hoos yimaada Denmark — kaas oo Madaxweyne Donald Trump uu sheegay inuu u baahan yahay sababo la xiriira amniga qaranka.

   Jasiiraddan baaxadda weyn ayaa isku aragta bartamaha duufaan siyaasadeed oo caalami ah oo magaca Trump ku xardhan yahay, dadka ku noolna si cad ayay u walaacsan yihiin.

   Hase yeeshee dal ahaan mar walba waxa ay u muuqdaan kuwo aad u deggan. Baraf iyo buuro ayaa ku fidsan inta ay ishu gaari karto dalkaasi, mararka qaarkoodna waxaa kala dhex gooya gacan-biyoodyo qurux badan — dhammaantoodna waxay ku yaallaan inta u dhexeysa Badweynta Arctic iyo Badweynta Atlaantik. Waxaa la yiraahdaa Greenland waxay ku taallaa dusha sare ee dunida; inta badan dhulkeeduna wuxuu ka sarreeyaa Wareegga Arctic.

   Greenland waaxa ay sagaal jeer ka weyn tahay Boqortooyada Ingiriiska, balse waxaa ku nool kaliya 57,000 oo qof, badankoodna waa dadka asaliga ah.

   Haweeney sheegtay in ay maalmahan qof walba ka shaki qabto, isla markaana aan magaceeda sheegin, ayaa qiratay in ay “aad uga baqayso dhimasho” suurtagalnimada ah in Trump uu jasiiradda xoog ku qabsado, kaddib markii ay daawatay faragelintii militari ee uu ku sameeyay Venezuela.

   “Dabcan, gumaysigii Denmark wuxuu sababay dhaawac nafsi ah oo weyn oo soo gaaray dad badan, balse annagu waxaan rabnaa oo keliya in nala daayo annagoo nabad ku nool,” ayay tiri.

7. 10 Jannaayo 2026Maxay tahay faa'iidada Somaliland ugu jirta aqoonsiga Israa'iil

   

   Xigashada Sawirka, Afhayeenka madaxtooyada Somaliland

   Jimcihii ay bisha Disembar 26ka ahayd ayaa lagu baraarugay ictiraafkii ugu horreeyey ee Somalland ay ka heshay dal awood iyo miisaan kuleh fagaarayaasha caalamka.

   Waxaa baraha bulshada ka soo muuqday ra'iisul wasaaraha Israa'iil, Benjamin Netanyahu, oo saxiixaya sharci uu dalkiisu ku aqoonsanayo Somaliland. Waxaa kale oo isla xilligaas Khadka ku jiray madaxweynaha Somaliland Cabdiraxmaan Cirro oo dhoollo-caddaynaya.

   Wixii intaas ka dambeeyey waxaa iska soo daba dhacayey diidmada iyo aqoonsigaas, mana jirin dal taageero u muujiyey, marka laga reebo Taiwan oo iyada qudheeda sheegata in ay ka go'day Shiinaha, sidaa darteed Israa'iil waxay noqonaysaa dalkii ugu horreeyey ee dal madax banaan u aqoonsada Somaliland.

   Somaliland iyo Israa'iil si furan oo toos ah uma aysan soo bandhigin waxa uu midba kan kale ka doonayo ee xiriirkan iyo aqoonsigan uu ku helayo. Dadka wax indha indheeya waxay aad isha ugu hayaan laba qodob oo Israa'iil dan u ah. Midi waa in ay saldhig ku yeelato badda cas si ay isaga ilaaliso khaatarta kaga imaanaysa Xuutiyiinta.

   Qodobka labaad oo ah mid aysan Somaliland ilaa hadda ogolaan ah, hase yeeshee jaamacadda carabtu ay sheegtay inuu ku jiro qorshaha Israa'iil ayaa ah in ay hesho dhul la dejiyo falastiiniyiinta ka dib marka la soo musaafuriyo.

   Sii akhri Warbixinta

8. 10 Jannaayo 2026Hindiya oo sheegtay inay si xooggan u taageersan tahay midnimada dhuleed ee Soomaaliya

   

   Xigashada Sawirka, thewire

   Hindiya ayaa Jimcihii (Janaayo 9) si xooggan u taageertay madax-bannaanida iyo wadajirka dhuleed ee Soomaaliya, kaddib markii Israa’iil ay aqoonsatay jamhuuriyadda iskeed madax banaanida ugu dhawaaqday ee Somaliland.

   “Hindiya waxay xiriir taariikhi ah la leedahay Soomaaliya. Waxaan sii wadeynaa inaan adkeyno muhiimadda ay leedahay in la ixtiraamo madax-bannaanida iyo wadajirka dhuleed ee dalka,” ayuu yiri afhayeenka Wasaaradda Arrimaha Dibadda ee Hindiya Randhir Jaiswal markii wax laga weydiiyay aqoonsiga Somaliland.

   Hadalkan ayaa yimid kaddib markii Israa’iil ay noqotay dowladdii ugu horreysay ee xubin ka ah Qaramada Midoobay oo si rasmi ah u aqoonsata Somaliland inay tahay dal madax-bannaan 26-kii Diseembar.

9. 10 Jannaayo 2026Wasiirka arrimaha dibadda Turkiga ''Aqoonsiga Israa'iil waa nasiib darada ugu weyn ee ku dhici karta Somaliland''

   

   Xigashada Sawirka, memurlar

   Wasiirka arrimaha dibada Turkiga Hakan Fidan oo ka hadlayay arrimo badan oo caalamka ayaa nasiib daro weyn oo ku dhacday Somaliland ku tilmaamay aqoonsiga ay israa'iil siisay jamhuuriyadda iskeeda madaxbanaanida ugu dhawaaqday.

   Isaga oo ka hadlaya ayuu yiri “Waxaan u arkaa aqoonsiga Israa'iill ee Somaliland inuu yahay musiibo ugu weyn oo ku dhici karta Somaliland. Maxaa noqon kara musiibo ka weyn tan oo ku timaada bulsho Muslim ah, ama hay’ad siyaasadeed oo Muslim ah? Qofna ma aqoonsana, Israa'iil ayaana ku aqoonsatay. Ma aha sababta aad tahay, laakiin sababtoo ah waxaad u adeegaysaa ujeedo xun, siyaasadooda gobolka ah. Haddii Ilaah kuu oggolaaday arrintan, waa ceeb iyo ciqaab weyn dhab ahaantii. Tani waxay ka dhigan tahay in qofku u baahan yahay inuu is xakameeyo.”

10. 10 Jannaayo 2026Magacyada iyo Tirada ururada iyo dalalka kahor yimid aqoonsiga Israa'iil ee Somaliland

    

    Xigashada Sawirka, Shutterstock

    Dalal badan iyo ururo caalami ah ayaa si cad uga hoos horjeestay aqoonsiga Israa'iil u aqoonstay Somaliland "dal madax-bannaan", iyagoo ku adkeysanaya in Somaliland ay weli tahay qayb ka mid ah Jamhuuriyadda Federaalka Soomaaliya.

    Dhammaadkii todobaadkii hore ayey ahayd markiii Ra'iisul wasaraaha Israa'iil Benjamin Netanyahu iyo Madaxweynaha Somaliland Maxamed Cabdiraxmaan Cirro ay yeesheen kulan qadka online-ka, kaas oo Netanyahu uu ku sheegay in Somaaliland ay ka mid noqoneyso saaxiibadooda diblomaasiyeed.

    Sii akhri warbixinta

11. 10 Jannaayo 2026Ciidamada Suuriya iyo kuwa kurdida oo ku dagaalamaya Waqooyiga Xalab

    

    Xigashada Sawirka, Getty Images

    Ciidamada dowladda Suuriya ayaa sheegtay inay dib u bilaabeen howlgallo militari si ay gacanta ugu soo dhigaan xaafad Kurdi ah oo ku taalla magaalada waqooyi ee Aleppo.

    Aagga (Sheekh Maqsoud iyo Ashrafiyah) waxaa hadda gacanta ku haya ciidamada Kurduudda, kuwaas oo iska caabinaya isku dayga Madaxweynaha Ahmed al-Sharaa ee ah in dagaalyahannadooda lagu soo daro maamul dhexe.

    Loollanka awoodda ayaa sababay afar maalmood oo isku dhacyo ah oo ka dhacay Aleppo, iyadoo la maqlayo rasaas iyo warar sheegaya in rasaas culus iyo gantaallo la adeegsaday.

    Ugu yaraan labaatan iyo hal qof oo rayid ayaa la dilay, kumanaan kalena waxay ka qaxeen magaalada.

12. 10 Jannaayo 2026Mudaharaadyadii u dambeeyay Iiraan iyo Trump oo ka digaya duqayn uu u geysto dalkaasi

    

    Xigashada Sawirka, Middle East Images / AFP via Getty Images

    Waxaa mar kale xalay ka dhacay Iiran mudaharaadyo ka dhan ah dowladda, iyada oo dadku isugu soo baxeen waddooyinka Tehran iyo magaalooyin kale, iyaga oo ka hor imaanaya mas’uuliyiinta.

    Muuqaallo ay BBC-da heshay, inkasta oo internet-ka la jaray, ayaa muujinaya dadweyne ku dhawaaqaya hal-ku-dhigyo ka dhan ah hoggaamiyaha ugu sarreeya, Ayatollah Khamenei.

    Sidoo kale, waxaa jira warar sheegaya in cadaadis rabshado wata uu sii socdo: dhakhtar ayaa sheegay inuu daaweeyay dad badan oo mudaharaadayaal ah oo qaba dhaawacyo rasaas ah.

    Iiran waxay ku eedeysay Maraykanka inuu hurinayo kacdoonka — arrin ay Washington ku tilmaantay mid aan macquul ahayn.

    Madaxweyne Trump ayaa sheegay in ay u muuqato in Iiran ay ku jirto “dhibaato weyn”, wuxuuna mar kale ka digay in uu amri karo weerarro milatari haddii mudaharaadayaasha la toogto.

13. 10 Jannaayo 2026Morocco iyo Senegal oo u gudbay afar dhammaanka koobka qaramada Afrika

    

    Xigashada Sawirka, sportsmole

    Martigeliyeyaasha tartanka kubadda cagta ee Koobka Qaramada Afrika, Morocco, ayaa u soo baxay wareegga afar-dhamaadka kaddib markii ay si sahlan uga adkaadeen Cameroon.

    Waxay ka badiyeen xulka shan jeer hantay horyaalka natiijo ah laba iyo eber. Morocco ayaa ka mid ah xulalka loo saadaalinayo inay qaadaan koobka qaramada Afrika.

    Kulankii kale ee wareegga siddeed-dhamaadka ee maalintaas, Senegal ayaa hal iyo eber kaga adkaatay Mali oo iyaduna u soo gudubtay afar dhammaadka koobka

    Aljeeriya iyo Nigeria ayaa iyaguna maanta wada ciyaaraya, halka Masar ay ka hor imaanayso xulka Ivory Coast.

14. 10 Jannaayo 2026Duuliyihii meydka Siyaad Barre sida qarsoodiga ku keenay Soomaaliya oo markii ugu horreysay hadlay

    

    Xigashada Sawirka, Baraha bulshada

    31 sano ka hor maanta oo kale, Xuseen Maxamed Canshuur iyo Maxamed Aadan (Maxamed Dheere) oo ah laba duuliye oo Kenyaan ah waxaa xafiiskooda ku yaallay garoonka diyaaradaha ee Wilson oo ku dhow caasimadda Nairobi, soo gaartay shaqo aan la filayn, taas oo xasaasi ahayd, halis waynna ay ku hoos duugneyd.

    Xuseen iyo Maxamed oo shaqo maalmeedkooda ku jira waxaa u yimid diblomaasi u dhashay dalka Nayjeeriya, kaas oo ka codsaday in meydka hoggaamiyihii hore ee Soomaaliya, Maxamed Siyaad Barre ay diyaaradooda u soo qaado dalkiisa hooyo si loogu aaso, kaddib markii uu ku geeriyooday Lagos oo uu magangalyo siyaasadeed ku joogay Nayjeeriya isagoo 80 jir ah.

    Maxamed Canshuur oo hore u ahaan jiray Kabtan ka tirsan Ciidamada cirka dalka Kenya, waxa ay Maxamed Aadan wada lahaayeen shirkadda duulimaadka Bluebird oo ka mid ah shirkadaha duulimaadyada gaarka loo leeyahay ee ugu waaweyn Kenya, isla markaana ay aasaaseen dhowr sano ka hor waqtigaas.

    Sii akhri warbixinta

15. 10 Jannaayo 2026Trump oo ku raadinaya shidaalka Venezuela 100 bilyan oo doolar

    

    Xigashada Sawirka, reuters

    Madaxweyne Trump ayaa la kulmay madaxda shirkadaha shidaalka caalamiga ah si ay uga wada hadlaan qorshayaal lagu horumarinayo kaydka tamarta ee ballaaran ee Venezuela, toddobaad kaddib markii ciidammada Mareykanku ay qafaasheen Nicolas Maduro.

    Madaxweyne Trump wuxuu doonayaa in shirkadaha shidaalka ay dalkaasi ku maalgeliyaan boqol bilyan oo doolar, wuxuuna sheegay inuu isagu go’aamin doono shirkadaha ka qayb qaadan doona.

    Agaasimaha guud ee Exxon Mobil (Darren Woods) ayaa sheegay in qaab-dhismeedka sharciyeed ee hadda jira uu Venezuela ka dhigayo dal “aan hadda lagu maalgashan karin”, balse uu ku kalsoon yahay in maamulka Trump uu samayn karo isbeddellada loo baahan yahay.

    Mas’uuliyiin kale oo ka tirsan warshadaha ayaa adkeeyay baahida loo qabo dammaanad-qaad amni ka hor inta aysan maalgelin sameyn.

16. 10 Jannaayo 2026Trump oo sheegay in Mareykanku ay tahay inuu “lahaado” Greenland si looga hortago in Ruushka iyo Shiinaha ay la wareegaan

    

    Xigashada Sawirka, Reuters

    Madaxweynaha Maraykanka Donald Trump ayaa mar kale ku celiyay hanjabaaddiisa ah inuu la wareegayo Greenland, isaga oo sheegay in Mareykanku khasab ku tahay inuu yeesho jasiiradda Arctic-ga si looga hortago in Ruushka ama Shiinuhu ay la wareegaan. Isaga oo kula hadlayay saxafiyiinta Aqalka Cad, ayuu sheegay in Mareykanku “wax ka qaban doono arrinta Greenland ha oggolaadaan ama ha diidaane.”

    Greenland waa dhul si iskiis isu maamula oo hoos yimaada Denmark, taas oo ku tilmaantay dalabaadka Madaxweyne Trump kuwo aan la aqbali karin.

    Bayaan wadajir ah, hoggaamiyeyaasha shanta xisbi siyaasadeed ee jasiiradda ayaa sheegay in mustaqbalka Greenland ay go’aaminayaan dadka reer Greenland. Waxay ugu baaqeen Mareykanka inuu joojiyo waxa ay ku tilmaameen “ixtiraam-darro” uu u muujinayo dalkooda.

    (Madaxweyne Trump ayaa ku andacooday in Ruushka ama Shiinaha ay leeyihiin maraakiib militari oo badan oo ku sugan biyaha ku wareegsan Greenland.)

17. 10 Jannaayo 2026Hoggaamiyaha Iiraan oo sheegay in mudaaharaadayaasha ay yihiin burburiyayaal isku dayaya inay ka farxiyaan Trump

    

    Xigashada Sawirka, MS Now

    Hoggaamiyaha Sare ee Iiraan, Ayatollah Cali Khamenei, ayaa ku tilmaamay mudaaharaadayaasha ka soo horjeeda dowladda kuwo “Khalkhal-wadayaal ah” oo isku dayaya “inay ka farxiyaan madaxweynaha Mareykanka”.

    Iiraan ayaa sidoo kale warqad u dirtay Golaha Ammaanka ee Qaramada Midoobay, iyadoo ku eedeysay Mareykanka inuu mudaaharaadyada u beddelay waxa ay ku tilmaantay “falal rabshado wata oo dumin ah iyo burbur ballaaran” oo ka dhacay Iiraan.

    Dhanka kale, Trump ayaa sheegay in Iiraan ay ku jirto “dhibaato weyn”.

    Mudaaharaadyada, oo galay maalintoodii 13-aad, ayaa ka billowday arrimo dhaqaale, balse waxay isu beddeleen kuwii ugu waaweynaa sannado badan, taasoo keentay baaqyo lagu soo afjarayo Jamhuuriyadda Islaamiga ah, halka qaar kalena ay ku baaqayaan dib u soo celinta boqortooyada.

    Ugu yaraan 48 mudaaharaadayaal ah iyo 14 ka tirsan ciidamada ammaanka ayaa la dilay, sida ay sheegeen kooxaha u dooda xuquuqda aadanaha.