දකුණු කාශ්මීරයේදී එල්ලවූ ප්රහාරය ගැන මෙතෙක් අප දන්නේ මොනවා ද?
ඡායාරූප මූලාශ්රය, Getty Images
- Author, බීබීසී පුවත්
දකුණු කාශ්මීරයේ පෙහෙල්ගාම්හි වෙඩි තැබීම් සිදු වූ ආකාරය පිළිබඳ තොරතුරු තවමත් වාර්තා වෙමින් පවතී, නමුත් ඇසින් දුටු සාක්ෂිකරුවන්ගෙන් සහ පොලිස් මූලාශ්රවලින් අප මෙතෙක් දන්නා දේ මෙසේ ය.
ඊයේ (අප්රේල් 22) සංචාරක නගරයක් වන පෙහෙල්ගාම්හි රැස්ව සිටි සංචාරකයින්ට ඒ අසල වූ වනාන්තරයෙන් පිටතට පැමිණි තුවක්කුකරුවන් සිව්දෙනෙකු වෙඩි තැබූ අතර, ඉන් අවම වශයෙන් පුද්ගලයින් 26 දෙනෙක් මිය ගියහ.
ප්රහාරය සිදු වූ බයිසරන් මීඩෝ ප්රදේශය, පෙහෙල්ගාම් සිට කිලෝමීටර් 5ක් (සැතපුම් 3ක්) පමණ දුරින් පිහිටා ඇති අතර එයට ළඟා විය හැක්කේ පයින් හෝ අශ්ව කරත්තයෙන් පමණි. මෝටර් රථවලට එම ස්ථානය වෙත යා නොහැක.
මුල් අවස්ථාවේදී තුවාල ලැබූවන්ගෙන් ඇතැමෙකු වෛද්ය ප්රතිකාර සඳහා අශ්වයන් මතින් රැගෙන යාමට සිදු විය.
ආරක්ෂක හමුදා එම ස්ථානයට පැමිණීමට පෙර ප්රහාරය එල්ල කළ පුද්ගලයින් එම ස්ථානයෙන් පලා යාමට සමත්ව තිබේ. ඔවුන් සොයා සෝදිසි මෙහෙයුමක් ආරම්භ කර ඇත. ප්රහාරය සිදු කිරීම සම්බන්ධයෙන් ඉන්දීය රජය මෙතෙක් කිසිදු කණ්ඩායමකට දොස් පවරා නොමැත.
තුවක්කුකරුවන් පැහැදිලිවම පිරිමින් ඉලක්ක කර ගත් බව ප්රහාරය ඇසින් දුටුවන් ප්රාදේශීය මාධ්ය වෙත පවසා තිබේ. සිද්ධිය ඇසින් දුටු ඇතැමෙකු පැවසුවේ ප්රහාරකයින් හිතාමතාම මුස්ලිම් නොවන අය ඉලක්ක කරගත් බවයි. අවම වශයෙන් එක් ප්රාදේශීය මුස්ලිම් වෙළෙන්දෙකු ද ප්රහාරයෙන් මිය ගියේය.
"ඔවුන් පැහැදිලිවම කාන්තාවන් අතහැර පිරිමි පුද්ගලයින්ට අඛණ්ඩව වෙඩි තිබ්බා, සමහර විට එක වෙඩි පහරකින් සහ සමහර විට බොහෝ උණ්ඩවලින්. ඒක කුණාටුවක් වගේ," එක් කාන්තාවක් AFP ප්රවෘත්ති ඒජන්සියට පැවසුවාය.
අන්තර්ජාලය ඔස්සේ සංසරණය වී ඇති වීඩියෝ කිහිපයකම මිනිසුන් තම ජීවිත බේරා ගැනීමට දිව යන ආකාරය දැක්වේ. එක් කාන්තාවක් තම දරුණු ලෙස තුවාල ලැබූ සැමියා දෙසට ඇඟිල්ල දිගු කරමින් උදව් ඉල්ලා කෑගසනු දක්නට ලැබේ.
වැටී තිබෙන මළ සිරුරු කිහිපයක් එම වීඩියෝ මගින් දැකිය හැකිය. තවත් වීඩියෝවක, වින්දිතයින්ට උපකාර කිරීමට ප්රදේශවාසීන් ඉක්මන් වන අයුරු දැකිය හැකිය.
වඩාත් ජනප්රිය සංචාරක ගමනාන්තයක සිදු වූ මෙම ප්රහාරය ඉන්දියාව කම්පනයට පත් කර ඇති අතර ලොව පුරා නායකයින් විසින් එය හෙළා දැක තිබේ. ඉන්දියාව පුරා ජනතාවද විරෝධතා දක්වා තිබේ.
අගමැති නරේන්ද්ර මෝදි සිය විදේශ සංචාරයක් කෙටි කර ආරක්ෂක ප්රධානීන් සහ අනෙකුත් නිලධාරීන් සමඟ සාකච්ඡා සඳහා දිල්ලිය වෙත පැමිණියේය.
"මෙවැනි ක්රියාවක් පිටුපස සිටින වගකිවයුත්තන්ට සහ වගකිව යුතු අයට අපගේ ප්රතිචාරය ඉතා ඉක්මනින් ශබ්ද නඟා සහ පැහැදිලිව ඇසෙනු ඇත," ආරක්ෂක අමාත්ය රාජ්නාත් සිං පැවසීය. "මෙම සිද්ධිය සිදු කළ අය පමණක් නොව, තිරය පිටුපස සිට ඉන්දියානු භූමියේ එවැනි ක්රියාවන් සිදු කිරීමට කුමන්ත්රණය කළ අය ද අපි සොයා ගන්නෙමු." ඔහු අවධාරණය කළේය.
