ਡੇਟਿੰਗ ਐਪਸ: ਪਹਿਲਾਂ ਵੱਡੀਆਂ ਆਸਾਂ ਤੇ ਫ਼ਿਰ ਨਿਰਾਸ਼ਾ ਦਾ ਰਾਹ ਕਿਵੇਂ ਬਣ ਗਈਆਂ ਹਨ
ਤਸਵੀਰ ਸਰੋਤ, Getty Images
- ਲੇਖਕ, ਓਜ਼ਗ ਓਜ਼ਡੇਮਿਰ
- ਰੋਲ, ਬੀਬੀਸੀ ਪੱਤਰਕਾਰ
ਇਸਤਾਨਬੁਲ ਦੀ ਇੱਕ 34 ਸਾਲਾ ਔਰਤ ਹੇਜ਼ਲ ਸਿਰੀਨ ਲਈ ਡੇਟਿੰਗ ਕਰਨਾ ਇੱਕ ਡਗਮਗਾਉਂਦੀ ਰਾਹ ਸੀ।
ਉਹ ਕਹਿੰਦੇ ਹਨ, "ਤੁਸੀਂ ਉੱਚੀਆਂ ਆਸਾਂ ਅਤੇ ਉਤਸ਼ਾਹ ਨਾਲ ਸ਼ੁਰੂ ਕਰਦੇ ਹੋ ਅਤੇ ਫਿਰ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।"
“ਇਹ ਮਸਲੇ ਉੱਤੇ ਸਾਰਿਆਂ ਦੀ ਕਹਾਣੀ ਇੱਕੋ ਜਿਹੀ ਹੈ।”
ਹੇਜ਼ਲ ਦਾ ਕਹਿਣਾ ਹੈ ਕਿ ਉਹ ਚਾਰ ਸਾਲਾਂ ਤੋਂ ਕੁਆਰੀ ਹੈ ਅਤੇ ਉਦੋਂ ਤੋਂ ਸਰਗਰਮੀ ਨਾਲ ਇੱਕ ਸਾਥੀ ਦੀ ਭਾਲ ਕਰ ਰਹੀ ਹੈ, ਪਰ ਇਹ ਕੋਈ ਸੌਖੀ ਪ੍ਰਕਿਰਿਆ ਨਹੀਂ ਹੈ ਅਤੇ ਜਿਸ ਨਾਲ ਤੁਸੀਂ ਰਿਸ਼ਤਾ ਬਣਾਉਣਾ ਚਾਹੁੰਦੇ ਹੋ ਉਥੋਂ ਤੁਹਾਡੀਆਂ ਆਸਾਂ ਮੁਤਾਬਕ ਸਾਥ ਨਹੀਂ ਮਿਲਦਾ। ਉਹ ਕਹਿੰਦੇ ਹਨ ਕਿ ਉਨ੍ਹਾਂ ਦੇ ਦੋਸਤਾਂ ਦਾ ਤਜ਼ਰਬਾ ਵੀ ਕੁਝ ਅਜਿਹਾ ਹੀ ਹੈ।
ਹੇਜ਼ਲ ਦੱਸਦੇ ਹਨ ਕਿ ਬਹੁਤ ਸਾਰੇ ਲੋਕ ਲੰਬਾ ਸਮਾਂ ਕਿਸੇ ਨਾਲ ਡੇਟ ਕਰਨ ਤੋਂ ਬਾਅਦ ਵੀ ਜਿਸ ਤਰ੍ਹਾਂ ਦੀ ਦਿਲਚਸਪੀ ਜਾਂ ਦੇਖਭਾਲ ਉਹ ਚਾਹੁੰਦੇ ਸਨ, ਨੂੰ ਪਾਉਣ ਵਿੱਚ ਅਸਫਲ ਰਹਿੰਦੇ ਹਨ।
ਉਹ ਕਹਿੰਦੇ ਹਨ ਕਿ ਉਸ ਨੂੰ ਕਈ ਵਾਰ ਗੂਸਟ ਕੀਤਾ ਗਿਆ, ਯਾਨੀ ਬਿਨ੍ਹਾਂ ਦੱਸਿਆਂ ਹੀ ਸੰਪਰਕ ਤੋੜ ਦਿੱਤਾ ਗਿਆ। ਜਿਸ ਬਾਰੇ ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਹ ਹਮਦਰਦੀ ਦੀ ਘਾਟ ਦੀ ਨਿਸ਼ਾਨੀ ਹੈ।
ਆਪਣੇ ਡੇਟਿੰਗ ਤਜ਼ਰਬਿਆਂ ਤੋਂ ਨਿਰਾਸ਼, ਹੇਜ਼ਲ ਕਹਿੰਦੇ ਹਨ ਕਿ ਉਨ੍ਹਾਂ ਨੂੰ ਯਕੀਨ ਹੈ ਕਿ ਇੱਥੇ ਬਹੁਤ ਘੱਟ ਲੋਕ ਹਨ ਜੋ ਸੱਚੇ ਰਿਸ਼ਤੇ ਨੂੰ ਅੱਗੇ ਵਧਾਉਣ ਲਈ ਵਚਨਬੱਧ ਹਨ।
ਤਸਵੀਰ ਸਰੋਤ, Getty Images
ਨੌਜਵਾਨਾਂ ਵਿੱਚ ਨਿਰਾਸ਼ਾ
18 ਸਾਲ ਤੋਂ ਵੱਧ ਉਮਰ ਦੇ ਤਕਰੀਬਨ ਅੱਧੇ ਅਮਰੀਕੀ ਮਹਿਸੂਸ ਕਰਦੇ ਹਨ ਕਿ ਡੇਟਿੰਗ ਵਧੇਰੇ ਚੁਣੌਤੀਪੂਰਨ ਹੋ ਗਈ ਹੈ
ਆਧੁਨਿਕ ਜੀਵਨ ਵਿੱਚ ਡੇਟਿੰਗ ਬਾਰੇ ਨਿਰਾਸ਼ਾ ਰੋਜ਼ਾਨਾ ਗੱਲਬਾਤ ਦਾ ਵਿਸ਼ਾ ਬਣ ਗਈ ਹੈ। ਫ਼ਿਰ ਚਾਹੇ ਉਹ ਚਾਹ ਜਾਂ ਕੌਫ਼ੀ ਦੇ ਕੱਪ ਉੱਤੇ ਹੋਣ ਵਾਲੀ ਚਰਚਾ ਹੋਵੇ ਜਾਂ ਫ਼ਿਰ ਸੋਸ਼ਲ ਮੀਡੀਆ ਉੱਤੇ ਹੋਣ ਵਾਲੀ ਬਹਿਸ ਹੋਵੇ।
ਪੀਊ ਰਿਸਰਚ ਸੈਂਟਰ ਵੱਲੋਂ 2019 ਵਿੱਚ ਕਰਵਾਏ ਗਏ ਸਰਵੇਖਣ ਮੁਤਾਬਕ, 18 ਸਾਲ ਤੋਂ ਵੱਧ ਉਮਰ ਦੇ ਤਕਰੀਬਨ ਅੱਧੇ ਅਮਰੀਕੀ ਮਹਿਸੂਸ ਕਰਦੇ ਹਨ ਕਿ ਪਿਛਲੇ ਦਹਾਕੇ ਵਿੱਚ ਡੇਟਿੰਗ ਵਧੇਰੇ ਚੁਣੌਤੀਪੂਰਨ ਹੋ ਗਈ ਹੈ।
ਇਸ ਦੇ ਲਈ ਦੱਸੇ ਗਏ ਕਾਰਨਾਂ ਵਿੱਚ ਤਕਨਾਲੋਜੀ ਅਤੇ ਡੇਟਿੰਗ ਪਲੇਟਫਾਰਮਾਂ ਦੀ ਵੱਧ ਰਹੀ ਵਰਤੋਂ, ਸਰੀਰਕ ਅਤੇ ਭਾਵਨਾਤਮਕ ਜੋਖ਼ਮ, ਡੇਟਿੰਗ ਦੇ ਵਧੇਰੇ ਵਿਅਕਤੀਗਤ ਬਣ ਜਾਣਾ ਸ਼ਾਮਲ ਹੈ। ਅੱਜ ਡੇਟਿੰਗ ਦੇ ਮਕਸਦ ਵਿੱਚ ਸਮਾਜਿਕ ਉਮੀਦਾਂ, ਨੈਤਿਕਤਾ ਨੂੰ ਬਦਲਣਾ ਸ਼ਾਮਲ ਹੈ।
ਸਰਵੇਖਣ ਦੇ ਨਤੀਜੇ ਸੁਝਾਅ ਦਿੰਦੇ ਹਨ ਕਿ ਜ਼ਿਆਦਾਤਰ ਲੋਕ ਆਪਣੇ ਡੇਟਿੰਗ ਜੀਵਨ ਤੋਂ ਅਸੰਤੁਸ਼ਟ ਹਨ ਅਤੇ ਸੰਭਾਵੀ ਸਾਥੀਆਂ ਨੂੰ ਮਿਲਣ ਵਿੱਚ ਮੁਸ਼ਕਲ ਮਹਿਸੂਸ ਕਰਦੇ ਹਨ।
ਡੇਟਿੰਗ ਐਪਸ ਦੀ ਵਰਤੋਂ ਘਟਣਾ
ਡੇਟਿੰਗ ਐਪਸ ਜੋ ਨਵੇਂ ਲੋਕਾਂ ਨੂੰ ਮਿਲਣ ਲਈ ਇੱਕ ਸੌਖਾ ਰਾਹ ਪ੍ਰਦਾਨ ਕਰਦਾ ਹੈ ਪਰ ਹੁਣ ਇਹ ਆਪਣਾ ਮਕਸਦ ਪੂਰਾ ਨਹੀਂ ਕਰ ਰਹੀ।
ਉਦਾਹਰਨ ਲਈ ਟਿੰਡਰ ਦੇ ਸਲਾਨਾ ਡਾਉਨਲੋਡਸ 2014 ਵਿੱਚ ਇਸਦੇ ਸਿਖਰ ਤੋਂ ਇੱਕ ਤਿਹਾਈ ਤੋਂ ਵੱਧ ਘਟ ਗਏ ਹਨ।
ਇੱਕ ਹੋਰ ਪ੍ਰਸਿੱਧ ਡੇਟਿੰਗ ਐਪਲੀਕੇਸ਼ਨ ਬੰਬਲ ਮੁਤਾਬਕ ਇਸਦੇ ਉਪਭੋਗਤਾ ਘੱਟ ਦਬਾਅ ਵਾਲੀ ਡੇਟਿੰਗ ਵਿੱਚ ਦਿਲਚਸਪੀ ਰੱਖਦੇ ਹਨ।
ਬੰਬਲ ਕਹਿੰਦੇ ਹਨ, "ਤਿੰਨਾਂ ਵਿੱਚੋਂ ਇੱਕ ਯੂਐੱਸ ਬੰਬਲ ਉਪਭੋਗਤਾ ਕਹਿੰਦੇ ਹਨ ਕਿ ਉਹ 'ਹੌਲੀ ਡੇਟਿੰਗ' ਕਰ ਰਹੇ ਹਨ ਅਤੇ ਜਦੋਂ ਡੇਟਿੰਗ ਦੀ ਗੱਲ ਆਉਂਦੀ ਹੈ ਤਾਂ ਆਪਣੀ ਮਾਨਸਿਕ ਸਿਹਤ ਨੂੰ ਤਰਜੀਹ ਦਿੰਦੇ ਹਨ ਅਤੇ ਮਿਲਣ ਲਈ ਘੱਟ ਤਾਰੀਖਾਂ 'ਤੇ ਜਾ ਰਹੇ ਹਨ।
ਅਧਿਐਨ ਇਹ ਵੀ ਦਰਸਾਉਂਦੇ ਹਨ ਕਿ ਨੌਜਵਾਨ ਡੇਟਿੰਗ ਐਪਸ ਨਾਲ ਭਾਵਨਾਤਮਕ ਥਕਾਵਟ ਦਾ ਅਨੁਭਵ ਕਰਦੇ ਹਨ।
ਯੁਵਾ ਖੋਜ ਏਜੰਸੀ ਸਾਵੰਤਾ ਮੁਤਾਬਕ 90 ਫ਼ੀਸਦ ਤੋਂ ਵੀ ਵੱਧ ਜ਼ੈਨ ਜ਼ੀ ਨੌਜਵਾਨ ਜੋ ਕਿ 1997 ਅਤੇ 2012 ਦੇ ਦਰਮਿਆਨ ਪੈਦਾ ਹੋਏ ਹਨ। ਡੇਟਿੰਗ ਐਪਸ ਤੋਂ ਨਿਰਾਸ਼ ਮਹਿਸੂਸ ਕਰਦੇ ਹਨ।
ਇੰਟਰਨੈਟ ਰੁਝਾਨਾਂ ਅਤੇ ਸੱਭਿਆਚਾਰ ਲੇਖਕ ਕੈਥਰੀਨ ਲਿੰਡਸੇ ਕਹਿੰਦੇ ਹਨ, "ਅਸੀਂ ਜਿਨ੍ਹਾਂ ਅਜੀਬ ਪਲਾਂ ਵਿੱਚ ਹਾਂ, ਉਹ ਇਹ ਹੈ ਕਿ ਐਪਸ ਸੱਭਿਆਚਾਰਕ ਤੌਰ 'ਤੇ ਜ਼ਰੂਰ ਘੱਟ ਰਹੇ ਹਨ, ਪਰ ਅਸਲ ਵਿੱਚ ਇਸ ਦਾ ਹਾਲੇ ਤੱਕ ਕੋਈ ਬਦਲ ਨਹੀਂ ਆਇਆ ਹੈ।"
ਤਸਵੀਰ ਸਰੋਤ, Getty Images
ਨੌਜਵਾਨਾਂ ਦੀ ਸਮਾਜਿਕ ਸਮਝ ਅਵਿਕਸਿਤ ਹੋਣਾ
ਉਹ ਦਲੀਲ ਦਿੰਦੇ ਹਨ ਕਿ ਸਮਾਜਿਕ ਇਕੱਠ ਅਤੇ ਸਰੀਰਕ ਸਬੰਧ ਵੀ ਜ਼ੈਨ ਜ਼ੀ ਲਈ ਕਿਸੇ ਕਿਸਮ ਦਾ ਆਕਰਸ਼ਨ ਨਹੀਂ ਹਨ।
ਲਿੰਡਸੇ ਸੁਝਾਅ ਦਿੰਦੇ ਹਨ ਕਿ ਮਹਾਂਮਾਰੀ ਨੇ ਇਸ ਮੁੱਦੇ ਨੂੰ ਹੋਰ ਵਧਾ ਦਿੱਤਾ ਹੈ, ਕਿਉਂਕਿ ਬਹੁਤ ਸਾਰੇ ਨੌਜਵਾਨਾਂ ਕੋਲ ਵਿਅਕਤੀਗਤ ਗੱਲਬਾਤ ਲਈ ਸਮਾਜਿਕ ਹੁਨਰ ਵਿਕਸਤ ਕਰਨ ਦੇ ਮੌਕੇ ਬਹੁਤ ਘੱਟ ਹਨ।
ਇਨਫ਼ਲੂਐਂਸਰਜ਼ ਫ਼ੌਰੀ ਪ੍ਰਭਾਵ ਵਾਲੀ ਪਹੁੰਚ ਰੱਖਦੇ ਹਨ।
ਜਿਵੇਂ ਕਿ ਲੋਕ ਤੇਜ਼ੀ ਨਾਲ ਕਹਿੰਦੇ ਹਨ ਕਿ ਉਹ ਡੇਟਿੰਗ ਤੋਂ ਨਿਰਾਸ਼ ਮਹਿਸੂਸ ਕਰਦੇ ਹਨ, ਸੋਸ਼ਲ ਮੀਡੀਆ ਪਲੇਟਫਾਰਮ ਡੇਟਿੰਗ ਅਤੇ ਰਿਸ਼ਤਿਆਂ ਬਾਰੇ ਸੁਝਾਅ ਅਤੇ ਜੁਗਤਾਂ ਨਾਲ ਭਰੇ ਹੋਏ ਹਨ।
"12 ਡੇਟਿੰਗ ਨਿਯਮ ਜਿਨ੍ਹਾਂ ਨੇ ਮੇਰੀ ਜ਼ਿੰਦਗੀ ਬਦਲ ਦਿੱਤੀ" ਜਾਂ "ਇੱਕ ਡੇਟ ਨੂੰ ਕਾਮਯਾਬ ਬਣਾਉਣ ਦੇ ਤਿੰਨ ਰਾਜ਼" ਵਰਗੀਆਂ ਸੁਰਖੀਆਂ ਦੇ ਨਾਲ ਇਨਫ਼ਲੂਐਂਸਰਜ਼ ਅਕਸਰ ਪਿਆਰ ਲੱਭਣ ਲਈ ਤੁਰੰਤ ਹੱਲ ਪ੍ਰਦਾਨ ਕਰਨ ਦਾ ਦਾਅਵਾ ਕਰਦੇ ਹਨ।
ਕੁਝ ਇਨਫ਼ਲੂਐਂਸਰਜ਼ ਰੂੜੀਵਾਦੀ ਸਬੰਧਾਂ ਦੀਆਂ ਕਦਰਾਂ-ਕੀਮਤਾਂ ਨੂੰ ਉਤਸ਼ਾਹਿਤ ਕਰਦੇ ਜਾਪਦੇ ਹਨ ਅਤੇ ਲਿੰਗਕ ਭੂਮਿਕਾਵਾਂ ਜਾਂ ਵਿਵਹਾਰਾਂ ਦਾ ਸੁਝਾਅ ਦਿੰਦੇ ਹਨ। ਜਿਵੇਂ ਕਿ ਰਵਾਇਤੀ ਨਾਰੀਵਾਦ ਜਾਂ ਰੂੜ੍ਹੀਵਾਦੀ ਨੂੰ ਉਤਸ਼ਾਹਿਤ ਕਰਨਾ।
ਜਿਵੇਂ ਸਟੀਫਨ ਲੈਬੋਸੀਅਰ ਦੇ ਯੂਟਿਊਬ 'ਤੇ 1.5 ਮਿਲੀਅਨ ਫਾਲੋਅਰਜ਼ ਵਾਲੇ ਰਿਲੇਸ਼ਨਸ਼ਿਪ ਕੋਚ ਹਨ। ਉਨ੍ਹਾਂ ਨੇ ਨੌਂ ਭਿਆਨਕ ਡੇਟਿੰਗ ਗ਼ਲਤੀਆਂ ਜੋ ਮਰਦਾਂ ਨੂੰ ਦੂਰ ਕਰ ਦਿੰਦੀਆਂ ਹਨ" ਜਾਂ "ਔਰਤਾਂ ਲਈ ਇੱਕੋ ਇੱਕ ਡੇਟਿੰਗ ਸਲਾਹ" ਵਰਗੀਆਂ ਸੁਰਖੀਆਂ ਨਾਲ ਵੀਡੀਓ ਬਣਾਉਂਦੇ ਹਨ।
ਲੰਡਨ ਅਧਾਰਤ ਸਮੱਗਰੀ ਇਨਫ਼ਲੂਐਂਸਰਜ਼ ਟੈਮ ਕੌਰ ਨੇ "ਉੱਚ-ਮੁੱਲ ਵਾਲੇ ਡੇਟਿੰਗ ਮਿਆਰਾਂ ਤਾਂ ਜੋ ਪ੍ਰਿੰਸੈਸ ਵਰਗਾ ਵਿਵਹਾਰ ਮਿਲੇ" ਬਾਰੇ ਆਪਣੇ ਢੁੱਕਵੇਂ ਸਿਰਲੇਖ ਵਾਲੇ ਵੀਡੀਓ "ਔਰਤਾਂ ਲਈ ਸਫਲਤਾਪੂਰਵਕ ਡੇਟ ਕਿਵੇਂ ਕਰੀਏ" ਬਾਰੇ ਗੱਲ ਕੀਤੀ।
ਉਨ੍ਹਾਂ ਦੇ ਟਿੱਕਟਾਕ ਉੱਤੇ ਅੱਧਾ ਮਿਲੀਅਨ ਫਾਲੋਅਰਜ਼ ਹਨ। ਉਹ ਸੁਝਾਅ ਦਿੰਦੇ ਹਨ ਕਿ, “ਜੇ ਤੁਸੀਂ ਚਾਹੁੰਦੇ ਹੋ ਕਿ ਕੋਈ ਤੁਹਾਡੇ ਨਾਲ ਜਨੂੰਨੀ ਹੋਵੇ, ਤਾਂ ਉਨ੍ਹਾਂ ਪ੍ਰਤੀ ਉਦਾਸੀਨਤਾ ਦਿਖਾਓ।"
ਕੈਥਰੀਨ ਲਿੰਡਸੇ ਨੋਟ ਕਰਦੇ ਹਨ ਹੈ ਕਿ ਨੌਜਵਾਨ ਵਧੇਰੇ ਪ੍ਰਗਤੀਸ਼ੀਲ ਅਤੇ ਮੁੰਡੇ- ਕੁੜੀਆਂ ਲਈ ਬਰਾਬਰਤਾ ਵਾਲੀਆਂ ਡੇਟਿੰਗ ਐਪਸ ਦੀ ਵਕਾਲਤ ਕਰਨ ਵਾਲੇ ਇਨਫ਼ਲੂਐਂਸਰਜ਼ ਵੀ ਹਨ।
ਉਹ ਕਹਿੰਦੇ ਹਨ ਕਿ ਇਨਫ਼ਲੂਐਂਸਰਜ਼ ਅਤੇ ਕੰਨਟੈਂਟ ਕ੍ਰੀਏਟਰ ਇਕੱਲੇਪਣ ਜਾਂ ਨਿਰਾਸ਼ਾ ਦੀਆਂ ਭਾਵਨਾਵਾਂ ਦਾ ਫ਼ਾਇਦਾ ਉਠਾਉਂਦੇ ਹਨ।
ਉਹ ਕਹਿੰਦੇ ਹਨ, "ਜੇ ਤੁਸੀਂ ਇੱਕ ਇਨਫ਼ਲੂਐਂਸਰਜ਼ ਹੋ ਜੋ ਕਲਿੱਕਾਂ ਦੀ ਭਾਲ ਵਿੱਚ ਹੈ, ਤਾਂ ਤੁਹਾਡੇ ਕੋਲ ਹੱਲ ਹੈ ਕਿਉਂਕਿ ਲੋਕ ਉਦਾਸ ਜਾਂ ਬੇਆਸ ਮਹਿਸੂਸ ਕਰ ਰਹੇ ਹਨ।"
ਤਸਵੀਰ ਸਰੋਤ, Getty Images
ਸੋਸ਼ਲ ਮੀਡੀਆ ਦਾ ਪ੍ਰਭਾਵ
ਹੇਜ਼ਲ ਸੀਰੀਨ ਦਾ ਕਹਿਣਾ ਹੈ ਕਿ ਉਹ ਅਕਸਰ ਸੋਸ਼ਲ ਮੀਡੀਆ 'ਤੇ ਡੇਟਿੰਗ ਬਾਰੇ ਸਲਾਹ ਦੇਣ ਵਾਲੀਆਂ ਵੀਡੀਓਜ਼ ਦੇਖਦੇ ਹੈ।
ਉਹ ਕਹਿੰਦੇ ਹਨ, "ਇਹ ਇੱਕ ਆਮ ਰੁਝਾਨ ਹੈ, ਲੋਕ ਮੇਕਅਪ ਕਰਨ ਤੋਂ ਲੈ ਕੇ ਡੇਟ 'ਤੇ ਜਾਣ ਦੇ ਸਹੀ ਸਮੇਂ ਬਾਰੇ ਚਰਚਾ ਕਰਦੇ ਹਨ। ਉਨ੍ਹਾਂ ਵਿੱਚੋਂ ਕੁਝ ਕੂੜਾ ਹਨ, ਪਰ ਕੁਝ ਲਾਭਦਾਇਕ ਹਨ। "
ਉਹ ਇਹ ਵੀ ਮੰਨਦੇ ਹਨ ਕਿ ਜਦੋਂ ਡੇਟਿੰਗ ਦੀ ਗੱਲ ਆਉਂਦੀ ਹੈ ਤਾਂ ਪਾਲਣਾ ਕਰਨ ਲਈ ਵਿਆਪਕ ਨਿਯਮ ਹਨ।
ਉਹ ਦਲੀਲ ਦਿੰਦੇ ਹਨ, "ਤੁਹਾਨੂੰ ਆਪਣੇ ਬਾਰੇ ਬਹੁਤ ਜ਼ਿਆਦਾ ਨਹੀਂ ਦੱਸਣਾ ਚਾਹੀਦਾ ਹੈ ਅਤੇ ਮਰਦਾਂ ਨਾਲ ਗੱਲਬਾਤ ਕਰਦੇ ਸਮੇਂ ਕੁਝ ਰਣਨੀਤੀਆਂ ਵਰਤਣੀਆਂ ਚਾਹੀਦੀਆਂ ਹਨ।"
ਤਸਵੀਰ ਸਰੋਤ, Getty Images
'ਸਵੈ-ਖੋਜ ਦੀ ਯਾਤਰਾ'
ਕੀ ਪਿਆਰ ਲੱਭਣ ਲਈ ਸੱਚਮੁੱਚ ਕੋਈ ਤੇਜ਼ ਹੱਲ ਹੈ?
ਮਨੋ-ਚਿਕਿਤਸਕ ਅਤੇ ਲੇਖਕ ਕੈਟੀ ਗਿਲਿਸ ਕਹਿੰਦੇ ਹਨ,"ਬਦਕਿਸਮਤੀ ਨਾਲ ਨਹੀਂ ਹੈ।"
“ਮੈਂ ਚਾਹੁੰਦੀ ਹਾਂ ਕਿ ਪਿਆਰ ਲਈ ਕੋਈ ਸੰਪੂਰਣ ਐਲਗੋਰਿਦਮ ਹੋਵੇ। ਮੈਨੂੰ ਲੱਗਦਾ ਹੈ ਕਿ ਲੋਕ ਅਜਿਹਾ ਮਹਿਸੂਸ ਕਰਨਾ ਚਾਹੁੰਦੇ ਹਨ, ਕਿਉਂਕਿ ਇਹ ਹੀ ਉਨ੍ਹਾਂ ਨੂੰ ਉਮੀਦ ਦਿੰਦਾ ਹੈ।
ਜਿਵੇਂ ਕਿ ਡੇਟਿੰਗ ਤਣਾਅਪੂਰਨ ਹੈ, ਗਿਲਿਸ ਦਾ ਤਰਕ ਹੈ, ਲੋਕ ਬੇਅਰਾਮੀ ਦੀਆਂ ਭਾਵਨਾਵਾਂ ਤੋਂ ਬਚਣ ਲਈ ਆਨਲਾਈਨ ਸੁਝਾਵਾਂ ਮੁਤਾਬਕ ਚੱਲਦੇ ਹਨ।
ਪਰ ਉਹ ਕਹਿੰਦੇ ਹਨ ਕਿ ਡੇਟਿੰਗ ਅਸਲ ਵਿੱਚ ਸਵੈ-ਖੋਜ ਦੀ ਯਾਤਰਾ ਹੋਣੀ ਚਾਹੀਦੀ ਹੈ ਕਿ ਤੁਸੀਂ ਕੌਣ ਹੋ ਅਤੇ ਤੁਸੀਂ ਇੱਕ ਕਿਸ ਤਰ੍ਹਾਂ ਦਾ ਸਾਥੀ ਚਾਹੁੰਦੇ ਹੋ।
ਉਹ ਕਹਿੰਦੇ ਹਨ ਕਿ ਲੋਕਾਂ ਨੂੰ ਉਹ ਰਿਸ਼ਤਾ ਲੱਭਣਾ ਚਾਹੀਦਾ ਹੈ ਜੋ ਉਹ ਚਾਹੁੰਦੇ ਹਨ, ਨਾ ਕਿ ਉਹ ਰਿਸ਼ਤਾ ਜੋ ਸਮਾਜ ਉਨ੍ਹਾਂ ਨੂੰ ਰੱਖਣ ਲਈ ਕਹਿੰਦਾ ਹੈ।
ਰਿਲੇਸ਼ਨਸ਼ਿਪ ਸਲਾਹਕਾਰ ਅਤੇ ਮਨੋਵਿਗਿਆਨੀ ਸ਼ਿਵਾਨੀ ਮਿਸਰੀ ਸਾਧੂ ਦਾ ਕਹਿਣਾ ਹੈ, “ਰਿਸ਼ਤੇ ਕੋਈ ਗਣਿਤ ਦਾ ਫਾਰਮੂਲਾ ਨਹੀਂ ਹਨ ਜਿਸ ਨੂੰ ਤੋੜਨ ਅਤੇ ਹੱਲ ਕਰਨ ਦੀ ਲੋੜ ਹੈ।”
ਉਹ ਸਪੱਸ਼ਟ ਗੱਲਬਾਤ ਅਤੇ ਸੱਚੇ ਇਰਾਦਿਆਂ ਦੀ ਅਹਿਮੀਅਤ 'ਤੇ ਜ਼ੋਰ ਦਿੰਦੇ ਹੋਏ ਕਹਿੰਦੇ ਹਨ, “ਚੰਗੇ ਰਿਸ਼ਤੇ ਲਈ ਕੋਈ ਸ਼ਾਰਟਕੱਟ ਨਹੀਂ ਹੁੰਦੇ। ਤੁਹਾਨੂੰ ਮਿਹਨਤ ਕਰਨੀ ਪਵੇਗੀ।”
ਮਨੋ-ਚਿਕਿਤਸਕ ਕੈਟੀ ਗਿਲਿਸ ਵੀ ਇਸ ਗੱਲ ਨਾਲ ਸਹਿਮਤ ਹੈ।
ਉਹ ਕਹਿੰਦੇ ਹਨ ਕਿ ਡੇਟਿੰਗ ਦੀ ਨਿਰਾਸ਼ਾ ਤੋਂ ਬਚਣ ਲਈ ਤੁਹਾਨੂੰ ਸਪੱਸ਼ਟ ਹੋਣਾ ਚਾਹੀਦਾ ਹੈ।
ਉਹ ਸਲਾਹ ਦਿੰਦੇ ਹਨ, “ਤੁਸੀਂ ਜੋ ਹੋ, ਉਸ ਪ੍ਰਤੀ ਸੱਚੇ ਰਹੋ।”
