Nigeria vs Algeria: Mahrez last minute goal clip Super Eagles wings
Wia dis foto come from, Reuters
Manchester City forward Riyad Mahrez score last minute free-kick to help Algeria defeat Nigeria 2-1 to progress to di final of dis year Africa Cup of Nations.
Di goal from Mahrez prove to be virtually di last kick of di game as di near 7000 Algeria fans wey dey di stadium begin jubilate dia team win.
Algeria take di lead for di first half thanks to Nigeria defender William Troost-Ekong own goal as im mistakenly convert Riyad Mahrez cross into im own net.
Ighalo later equalise for Nigeria for di 72nd minute after im score penarity with di help of VAR.
Di Desert Foxes control di most part of di game and even hit di bar late on as Nigeria no really create enough chances for di match.
With di victory, Algeria go play Senegal for di final of dis year Africa Cup of Nations on Friday, 19 July.
Meanwhile Nigeria go face Tunisia on Wednesday, 17 July for di third place match.
