Lawmakers confam Peter Akpe as Deputy govnor of Bayelsa state
Wia dis foto come from, Bayelsa Govt New Media
Bayelsa State House of Assembly don confam Dr Peter Akpe as di new Deputy govnor of di state.
Govnor Douye Diri bin nominate Akpe shortly after di burial of di late former deputy govnor Lawrence Ewhrudjakpo on January 30, 2026, for im hometown, Ofoni, Sagbama Local Govment Area of Bayelsa State. E die on 11 December, 2025 afta e collapse for office.
Bifor dis elevation to be di Deputy Govnor, e bin be di Chief of Staff to Govnor Douye Diri.
Peter Akpe come from Ebedebiri Federated Community for Sagbama Local Govment Area of Bayelsa State.
Who be Peter Akpe
Dr Akpe na ordained clergy by di Redeemed Christian Church of God (RCCG), and im career cover both di civil service and politics as e don serve for di Rivers and Bayelsa state civil services before e join politics.
For im political career, Akpe don serve as a two-term member of di Bayelsa state house of Assembly from 2011 to 2019, and serve as majority leader throughout im stay for di legislature.
E also serve as commissioner between 2008 and 2011 under Govnor Seriake Dickson administration.
Wit dis swearing in, Dr Akpe go be di fifth deputy govnor di oil rich state don get.
