د پاکستاني پوځي سرچېنې وايي چې ١٥ زره پوځيان يې له پنځو زره طالبانو سره په سوات او شاوخوا سيمو کې پر جګړه بوخت دي .

د پاکستان پوځ وايي د مېنګورې په ښار کې پوځيان له درو ورځو راهيسې کوڅه په کوڅه په جګړې او تصفيوي عملياتو بوخت دي .

پوځ وايي چې تېره ورځ يې پنځه وسله وال طالبان وژلي او ١٤ نور يې نيولي دي .

د پوځ وياند تورنجنرال اطهر عباس وويل د مېنګورې تصفيه کول به لږ ترلږه يوې اوونۍ وخت ته اړتيا ولري :

(( هغه سيمې چې موږ يې تصفيه کوو، هڅه کوو چې د پوځ له خوا په کې له ولسي وګړو سره په بشپړ ډول مرسته وشي . تمه ده چې د مېنګورې ښار نيول به له يوې اوونۍ يا لسو ورځو څخه زيات وخت نه اخلي . ))

په سوات کې او شاوخوا سيمو کې د جګړو له پيله راپدېخوا سلګونه ملکي وګړي وژل شوي او په لکونو نور د خپلو کورونو پرېښودو ته اړ شوي دي .

پنځه سترې څلورلارې  ځواکونه مو اوس پياوړي شوي او د پاکولو عمليات يې پيل کړي . په مېنګوره کې پنځه سترې څلور لارې دي، چې درې يې اوس د امنيتي ځواکونو په واک کې دي . جنرال اطهر عباس

اطهرعباس زياتوي پوځ د مېنګورې د ښار له بهره ښار ته يوه لاره جوړه کړې :

(( له ښار نه بهر پوځيانو له هغو ځواکونو سره اړيکي ټينګ کړي، چې د ښار د ننه د پوځي حرکت د فشار له امله کلابند و، ځواکونه مو اوس پياوړي شوي او د پاکولو عمليات يې پيل کړي . په مېنګوره کې پنځه سترې څلور لارې دي، چې درې يې اوس د امنيتي ځواکونو په واک کې دي .))

بل خوا د بي بي سي اردو وېبپاڼې په سوات کې د طالبانو د تحريک د مشر مولانا فضل الله د وياند له خولې ليکي چې د طالبانو مشرتابه خپلو وسله والو ته امرکړی، چې د پاکستان پر امنيتي ځواکونو ډزې ونه کړي .

د وياند مسلم خان له خولې ويل شوي دا امر يې ځکه کړی، چې ولسي خلکو ته مرګ ژوبله وانه وړي، او دا کار به د سوات په نورو برخو کې هم عملي شي .

د پاکستان پوځ هم بيا د جګړې له پيل راهيسې په دې خبره ټينګار کوي چې د مېنګورې نيول به وخت ونيسي، ځکه دوی نه غواړي چې د ملکي خلکو مرګ ژوبله ډېره شي .

تورنجنرال اطهر عباس وايي پوځ يې يوازې هغه کسان په نښه کوي، چې وسلې ورسره وي .

	دا مهال په مېنګوره ښار کې شاوخوا ٢٠ زره کورنۍ دي، پوځ يې ژوند ته د پاملرنې په موخه په خپلو عملياتو کې ورو ګامونه ږدي .

خو ځينې عيني شاهدان وايي چې پوځ په خپل چلند کې دومره دقيق نه دی .

که څه هم په مېنګوره کې کوڅه په کوڅه د طالبانو پاکول روان دي، خو لاهم د دغه ښار پر ډېرو برخو طالبان واکمن دي .

دا مهال په مېنګوره ښار کې شاوخوا ٢٠ زره کورنۍ دي، پوځ يې ژوند ته د پاملرنې په موخه په خپلو عملياتو کې ورو ګامونه ږدي .

د پاکستاني پوځي سرچېنې وايي چې ١٥ زره پوځيان يې له پنځو زره طالبانو سره په سوات او شاوخوا سيمو کې پر جګړه بوخت دي .

پوځ دا هم وايي چې د جګړو له پيله تر اوسه شاوخوا ١٠٠٠ وسله وال طالبان او ٥٠ پاکستاني پوځيان وژل شوي دي .