دا لومړى ځل نه دى چې بغداد کې امريکايي پوځيان بې گناه ملکي وگړي په نښه کوي، په تېر نومبرکې هم د بغداد شمال پلو التاجي ښارگوټي کې ٢٥ بې گناه ملکي کسان ووژل شول.

په عراق کې د امريکا پوځ څرگنده کړه چې په دې عملياتو کې درې ملکي کسان ټپيان شوي چې دوه يې ماشومان دي. خو په سيمه کې عيني شاهدان وايي چې د امريکايي پوځيانو په دغه هوايي بريد کې ٢٠ ملکي وگړي وژل شوي چې ١٧ يې د يوې کورنۍ غړي ول.

د امريکايي چارواکو په يوۀ راپور کې راغلي چې له بريد وروسته بهرني ځواکونه د ښار له يوه قومي مشر سره کتلي او ټينگار يې کړى چې د نوموړې ''پېښې'' په اړه به څېړنه کوي. راپور زياتوي چې په سيمه کې مېشتو امريکايي چارواکو د ټپيانو له کورنيو څخه بښنه غوښتې ده.

دا لومړى ځل نه دى چې په سيمه کې امريکايي پوځيان بې گناه ملکي وگړي په نښه کوي.

په تېر نومبر کې هم د بغداد شمال پلو التاجي ښارگوټي کې يوۀ عراقي چارواکي خبردارى ورکړى و چې امريکايي پوځيانو د القاعده ډلې پر ضد ١٢ ساعته عملياتو کې ٢٥ ملکي کسان ووژل.

بل خوا پرون (يکشنبې، ٣ جنورۍ) د بعقوبې ښار په مرکز کې د امريکايي امنيتي مسوولينو سربېره په سيمه کې د سيمه ييزې شورا امنيتي مسوول حسين الزبيدي د يوې چاودنې په ترڅ کې ووژل شول.

نورې پېښې:

د عراق په شمال کې ايتلافي ځواکونو پرون (يکشنبې) درې شکمن وسله وال کسان ووژل او ٣٦ نور يې اسيران ونيول.

همداراز د بغداد په الکاظميه سيمه کې د عراقي پوليسو او وسله والو کسانو ترمنځ نښته کې دوه کسان ووژل شول او درې نور سخت ټپيان شول.

او د بعقوبې ښار لوېديځ الکاطون سيمه کې په يوۀ بله نښته کې څلور وسله وال کسان هغه وخت ووژل شول چې عراقي پوليسو يې پر کور چاپه واچوله، همدا راز د بغداد په سويل الکوت ښارگوټي کې يو پوليس هغه مهال ووژل شو چې له يو تېزرفتاره موټره پرې ډزې وشوې.

د عراق د پارلمان پروينا، پرون په بعقوبه کې دوه امريکايي امنيتي چارواکي د ديالي ولسوالۍ د امنيتي مسوول سربېره په يوه چاودته کې ووژل شول.