راب واټسن د بي سي سي ددفاعي چارو خبريال

	که د المصري رښتيا هم مړ وي، په عراق کې د تاوتريخوالي د کمښت تمه نه شي کېداى

که يې پخلى وشى، دا پېښه به په عراق کې يو ه خورا مهمه پر مختيا وي، خو داسې يو ه پرمختيا نه چې ډير ژر به په هغه هيواد کې د القاعدې پر کارونو اغيز وکړي . له اوږدې مودې راهيسې امريکايي چارواکي دغلته د القاعدې او نورو سني اورپکو ډلو ترمنځ د اختلافونو خبره کوي .

د ابو ايوب المصري د وژنې خبر کيداى شي چې امريکايانو او عراقيانو ته يوه ښه موقع په لاس ورکړي چې ددغو اختلافونو د زياتولو لپاره ترې گټه پورته کړي .

خو که ښاغلى المصري رښتيا هم مړ وي، له دې سره سره دا تمه به له وخته مخکې وي چې په عراق کې دې تاوتريخوالى لږ شي.

تر د ې وړاندې کله چې په عراق کې د القاعدې پخوانى مشر ابو مصعب الرزقاوي ووژل شو، د تاوتريخوالي په کچه کې د پام وړ کموالى را نغى..

يه تيرو څلور کلونو کې د القاعدې کارونو په عراق کې لوى بدلونونه ليدلي چې د پخوا خلاف اوس تر يوې منظمې مشرتابه لاندې نه دي، بلکې غړي يې تر ډېره په خپله خوښه کار کوي.

ابو ايوب المصري يو کلاسيک مصري جهادي سړى بلل کېږي چې په ١٩٨٠ لسيزه کې د تندلارو اسلامپالو ډلو غړى شو او د افغانستان په کمپونو کې يې روزنه ترلاسه کړه .

باور کيږي چې نوموړى په ٢٠٠٢ کال کې پر عراق د امريکا له يرغله وړاندې هلته تللى و چې د القاعدې لومړنۍ سټې جوړې کړي .