بغداد وروسته له څو اوونيو يو وار بيا د يوې زورورې چاودنې له امله ولړزيدۀ

په دغې چاودنې کې د بغداد ١٣ اوسيدونکي وژل شوي او گڼ نور پکې ټپيان شوي دي .

پوليس وايي بم په هغې پېټۍ کې اېښودل شوى و چې مرغان پکې راوړل شوي و . چاودنه د مرغانو او څارويو د پلورلو او پېرلو په يوۀ بازار کې وشوه چې خورا ډيره گڼه گوڼه پکې وه .

دغۀ بازار ته د جمعې په ورځو خورا ډير خلک ورځي . په بغداد کې د بي بي سي خبريال وايي دې چاودنې د خلکو هغه ډاډ ټکنى کړ چې ويل يې اوس د ډيرو شويو امريکايي سرتيرو له امله دغلته کراري ده .

د بغداد د امنيت په باب خبرو په سوريې کې ميشت عراقي کډوال په دې وروستيو کې هڅولي او دغه ښار ته هره ورځ په سلگونو کډوال ورستنيږي .