د بېنظير بوټو تر وژنې وروسته د پاکستان په ښارونو کې پوځ پر گزمو بوخت دى

دغه ټاکنې د جنوري په ٨ نېټه کيدونکې وې .

د پاکستان د انتخاباتو کميسيون وړمه ورځ ويلي و چې د سه شنبې په ورځ به د ټاکنو د ترسره کيدو پر باب خپله پريکړه اعلانوي .

خو د کميسيون چارواکو د سه شنبې په ورځ وويل چې له سياسي گوندونو سره تر سلا مشورو وروسته به خپله پريکړه د چارشنبې په ورځ ( د جنوري ٢ ) اعلانوي .

د پاکستان دوو لويو حکومت مخالفو گوندونو واردمخه غوښتي دي چې ټاکنې دې پر خپل وخت وشي .

دوى په دې باور دي چې د ټاکنو ځنډول د ولسمشر مشرف او د هغۀ د ملاتړي گوند په گټه دي .

دغو گوندونو خبردارى ورکړى دى چې که ټاکنې وځنډيږي نو دوى به په مظاهرو لاس پورې کړي .

په اسلام اباد کې د بي بي سي خبريالان په دې باور دي چې ښايي دغه ټاکنې تر څو اوونيو پورې وځنډيږي .

د دغو پارلماني ټاکنو لپاره چمتووالى او د کانديدانو له خوا منډې ترړې تر هغه وروسته خرابې شوې چې پخوانۍ لومړۍ وزيره بېنظير بوټو د دسمبر په ٢٧ نېټه په پينډۍ کې ووژل شوه .

د اغلې بوټو تر وژنې وروسته په ټول پاکستان کې تاوتريخوالى وليدل شو چې په لسگونو کسان يې ووژل او د چارواکو په وينا يې دولتي شتمنيو ته په سلگونو ميليونه ډالره تاوان واړاوۀ .