ترکي چارواکي وايي له عراق نه نور سرتېري هم باسي

ترکيه وايي څو ورځې وړاندې د عراق له سويل نه د يو شمېر سرتېرو له وېستو وروسته نور سرتېري هم له دغه هېواد باسي.

د ترکيې د بهرنيو چارو وزارت تاييد کړې د دغو ځواکونو د استولو پر سر له عراق سره يو څه (ناسم پوهاوی) شوی.

انقره دغه ګام له هغې يوه ورځ وروسته اخلي چې ولسمشر اوباما د ترکيې له ولسمشر رجب طيب اردوغان په کلکه وغوښتل له بغداد سره کړکېچ کم کړي.

ترکيې د دې مياشتې په لومړيو کې عراق ته ۱۵۰ سرتېري استولي وو، ويل يې چې دغه سرتيري د ترکي پوځي روزونکو ساتنه کوي.

انقرې دغه سرتېري موصل ته نژدې بعشيقه کمپ ته د عراقي کردي ځواکونو د روزنې لپاره استولي وو.

موصل له ۲۰۱۴ کال راپدېخوا د اسلامي دولت ډلې تر ولکې لاندې.

خو بغداد ویلي ترکي سرتيري د دوی په سلا مشوره عراق ته نه دي ورغلي او دا د عراق له ځمکنۍ بشپړتيا او نړيوال قانون سرغړونه ده.

د ترکيې د بهرنيو چارو وزارت په يوه اعلاميه کې ويلي: ''ترکيه د عراق له حکومت سره د سرتېرو د استولو پر سر ناسم پوهاوی تاييدوي. ترکيه دغه راز د عراق د حکومت په اندېښنو هم ښه پوهېږي.''

په اعلاميه کې نه دي ويل شوي چې څومره ترکي ځواکونه به له عراق نه وېستل کېږي او دغه ځواکونه به چېرته وي.

د دوشنبې پر ورځ د ترکيې حکومتي اژانس د پوځي چارواکو له قوله وويل د شاوخوا ۱۰-۱۲ موټرو کاروان له بعشيقه نه ووت او د عراق د شمال پر لوري ولاړ.