د لاهور فابريکه کې د وژلو شويو شمېر ۳۷ ته لوړ شوی
د عکس سرچینه، AP
د پاکستاني چارواکو په وينا د لاهور په راپرېوتلې فابريکه کې د وژلو شويو شمېر ۳۷ ته لوړ شوی او د مرستې عمليات اوس هم روان دي.
د ژغورنې ډلې وايي تراوسه يې ۱۰۳ کسان ژغورلي او وايي د پېښې پر مهال ودانۍ کې ۱۱۴ کسان موجود وو.
دغه څلور پوړيزه ودانۍ د چهارشنبې پر ورځ د لاهور ښار څنډو کې په يوه صنعتي سيمه کې ونړېده.
د فابریکې یو کارکوونکي د فرانسې خبري آژانس ته ویلي، د ودانۍ په یوه داسې برخه کې چې اوس ورتګ ورته ممکن نه دی، ۵۰ کسانو کار کاوه. دی وايي په کارکوونکو کې ۱۲کلن ماشومان هم وو.
د عکس سرچینه، AP
د عکس سرچینه، AFP
تر ودانۍ لاندې بندو کسانو د ژغورنې په عملیاتو کې شاوخوا ۴۰۰ کسانو برخه لرله.
ويل کېږي د فابريکي د څښتن مړی هم له ودانۍ ايستل شوی چې وروسته به خاورو ته وسپارل شي.
ډېری وګړي په لانديني او لومړي منزل کې وژل شوي دي.
د ژغورنې ډلې وايي کېدای شي اوس هم ځينې خلک تر خاورو لاندې وي.
د پېښې د پلټنې ډلې د پنجشنبې په ورځ له سيمې کتنه وکړه.
په دغې ودانۍ کې د پلاستیک جوړولو فابریکه ودانه وه او د ځایي خلکو په وینا په وروستۍ زلزله کې ودانۍ ته یو څه زیان رسېدلی و.
د عکس سرچینه، AFP
د عکس سرچینه، AFP
په لاهور کې تر دې وړاندې هم لرغونې او زړې ودانۍ نړېدلي او لسګونه کسان یې وژلي دي.
په ۲۰۱۲ کال کې د لاهور په ګنجان اباد سیمه کې د یوې ودانۍ نړېدو په پېښه کې ۲۱ کسان وژل شوي وو.
تېر کال د دروغه والا سیمې په یوه جومات کې د لمانځه پر مهال د ودانۍ نړېدو پېښه کې ۲۲ کسانو خپل ژوند له لاسه ورکړی و.
د عکس سرچینه، AFP
