سوریه کې توغندیز برید لسګونه کسان وژلي

د سوریې د بشري حقونو فعالان او سیمه ییز خلک وايي، پلازمېنې دمشق ته څېرمه د دوما پر یوه بازار د حکومتي ځواکونو توغنديو لږترلږه ۴۰ کسان وژلي او ۱۰۰ نور یې ټپیان کړي دي.

بریتانیا مېشتې د سوریې د بشري حقونو ډلې ويلي، سوري ځواکونو پر دوما ښار ۱۲ توغندني توغولي دي.

دوما ښار له پلازمېنې ۱۵ کیلومتره لیرې په شمال ختیځ کې پروت دی.

د حکومت مخالفې "ولسي دفاع" په نامه ډلې د خواله په رسنیو کې په برید کې د وژل شویو او ټپیانو انځورونه خپاره کړي دي.

دوما ښار ډېر کله د حکومتي ځواکونو د بمباریو شاهد دی، چې تر ډېره یې له ښاره پر دمشق ښار د مخالفو وسله والو د هاوان بریدونو د غچ اخیستو په مقابل کې کوي.

سوري فعالان وايي، په تېره اګست میاشت کې تر ۱۰۰ ډېر کسان هغه مهال ووژل شول، چې سوري ځواکونو پرله پسې هوايي بریدونه وکړل.