ټایوان کې زورور توپان څلور کسان وژلي

په تايوان کې زورور توپان چې سخت باد او قوي باران هم ورسره دی لږترلږه څلور کسان مړه کړي دي.

دغه توپان چې چټکتيا يې په ساعت کې ۲۳۰ کيلومترو ته رسېږي له ختيځو سمندرغاړو تېر شوی او اوس له دغه ټاپو په تېرېدو دی.

توپان ونې له بېخه وېستلي، د اعلانونو لوحې يې راغورځولي او لږترلږه په يوه کلي کې د ځمکې ښووېدو لامل شوی دی.

شاوخوا دوه ميليونه کورنۍ د توپان له امله له برېښنا بې برخې شوې دي.

د ريل ګاډي خدمتونه او پروازونه لغوه شوي او ټول ښوونځي او دفترونه تړل شوي دي.

د تايوان د هوا پېژندنې اداره وايي په داسې حال کې چې توپان په شمال لويديځ لوري روان دی، زور يې مخ په کمېدو دی.

د قربانيانو په مينځ کې يوه اته کلنه نجلۍ او د هغې مور هم شته، چې سمندر ته ورغورځېدلي دي.

يوه عيني شاهد د تايوان يوه تلوېزيوني چينل ته ويلي: ''ما په خپل ۶۰ کلن ژوند کې داسې پياوړی او زورور توپان ليدلی نه و. ''

د توپان له رسېدو وړاندې حکومت زرګونه کسان له خپلو کورونو ووېستل.

اټکل کېږي چې توپان تر دې وروسته د تايوان تړانګې او بيا وروسته د چين خاورې ته ورواوړي.