اوباما له مصر د بندي خبریالانو خوشي کول غوښتي
د عکس سرچینه، BBC World Service
امریکايي چارواکو ویلي، ولسمشر اوباما په نیویارک کې د مصر له ولسمشر عبدالفتاح السیسي سره په خبرو کې د بندي شویو خبریالانو په اړه خبرې کړې او د دوی د خوشي کولو غوښتنه یې ترې کړې ده.
سرچینه وايي، اوباما سیسي ته د بندي خبریالانو په اړه اندېښنه وښوده.
نوموړي د مصر پر سیاسي اړدوړ هم اندېښنه وښوده.
دا لیدنه او خبرې د ملګرو ملتونو د عمومي غونډې په څنډو کې شوې دي.
د مصر مخکنی دفاع وزیر السیسي د مصر مخکنی منتخب ولسمشر محمد مرسي وپرځاوه.
مرسي په دیموکراتیک ډول په ټاکنو کې ګټونکی ولسمشر و.
السیسي مرسي او د اخوان المسلمین زرګونه پلویان او لسګونه مشران بندیان کړل، چې ترې زیږېدلي اړدوړ د ګڼو خلکو ژوند هم واخیست.
په دې کار سره د واشنګټن او قاهرې ترمنځ هم اړیکي ترینګلي شول.
د امریکا د ملي امنیت سلاکار بین روډس وايي، د دواړو مشرانو ترمنځ خبرې د دواړو هېوادونو پر ګډو ګټو راڅرخېدې.
اوباما او السیسي د اسلامي دولت ډلې له لوري د ګڼو سیمو د نیول کېدو په اړه او پرضد یې د نړیوال ایتلاف رامنځ ته کېدو او همکارۍ په باب هم خبرې کړې دي.
رودس وايي:"ولسمشر اوباما ټینګار وکړ، چې په مصر کې بندي شوي خبریالان باید خوشي شي."
واشنګټن څو ځلې په مصر کې د بندي خبریالانو په اړه اندېښنه ښودلې.
مصري حکومت د الجزیرې شبکې درې خبریالان بندیان کړي، چې یو پکې استرالیایی پیټر ګریسټي او دوه نور مصریان محمد فهمي او باهر محمد دي.
فهمي د کاناډا تابعیت هم لري.
مصر ادعا کوي، چې ګني دغه خبریالان یې د اخوان المسلمین ګوند د خواخوږۍ په تور نیولي دي.
