کوفي عنان د سوریې ماموریت پرېږدي

د سوریې لپاره د نړیوالې ټولنې استازي کوفي عنان د منځګړي په توګه خپله دنده پرېږدي.

نوموړی به د اګست میاشتې په پای کې په سوریه کې د کړکیچ د هوارولو په برخه کې د ملګرو ملتونو او عربي اتحادیې له استازیتوبه لاس واخلي.

ښاغلي عنان د روان کال د فبرورۍ له میاشتې راهیسې په سوریه کې د تاوتریخوالي د پای ته رسولو هڅې او په جګړو کې د ښکېلو غاړو ترمنځ منځکړيتوب کاوه.

په جینیوا کې د خبرو پرمهال کوفي عنان وویل د امنیت په شورا کې اختلافاتو او په سوریه کې مخ په زیاتېدونکي تاوتریخوالي د ده د رول اغېزه بدله کړه.

ښاغلی عنان وايي ده دغې دندې ته په سوریه کې د سولې په خاطر غاړه ایښې وه خو سوله اوس هم یوه ننګونه ده.

ښاغلي عنان وویل دی د خپلې دندې د پرېښودلو خبره پر داسې مهال کوي چې په دمشق او حلب کې د یاغیانو او دولتي ځواکونو ترمنځ نښتې روانې دي.

ښاغلي عنان زیاته کړه چې د ده یا بل هر چا لپاره ناشونې ده چې د سوریې له حکومت او مخالفینو سره کار وکړي چې د کړکیچ د حل په خاطر سیاسي بهیر کې ورګډ شي.

د ښاغلي عنان په وینا د سوريې حکومت په بیا بیا د سولې شپږ مادیز پلان ردوي او بله غاړه مخالفین له تاوتریخوالي لاس نه اخلي.

د یادولو ده چې د سوریې لپاره د ملګرو ملتونو او عربي اتحاديې د استازي په توګه د کوفي انان ماموریت د اګست د میاشتې په پای کې پای ته رسیږي چې په خپله وینا یې نور نه غواړي دغې دندې ته دوام ورکړي.