د اوسکار بخت: غوره ښځينه لوبغاړې

مریل سټریپ: اوسپنیزه مېرمن

شاید ټولو ته دا عادي برېښېدلې وي، چې مریل سټریپ په فلمي نړۍ کې د اوسکار جایزې ته ځان نومولی دی.

مریل اوولس ځلې د اوسکار جایزې ته ځان کاندید کړی، خو یوازې دوه ځلې یې جایزه ګټلې، چې وروستی ځل یې په ۱۹۸۲ کال د (سوفي انتخاب) په فلم کې وو.

امکان لري چې سږ کال هم هغه د هلن میرن او کالین فرت په څېر د برتانیا د سیاسي څېرو په رول کې په لوبېدو سره د اوسکار د اکاډیمۍ د غړو نظر ځانته ورجلب کړي.

او دا فرصت ومومي چې د برتانیا د مخکنۍ لومړۍ وزیرې مارګرېت تاچر په رول کې چې په اوسپنیزه مېرمن کې یې لوبولی دی، اوسکار ته ځان ورسوي.

هغې په دې رول کې د لوبېدو لپاره، د ګولډن ګلوب او بفتا جایزې وګتلې، او اوس ډېرې لرې هم نه ښکاري چې د اوسکار جایزه خپله کړي.

په ۱۹۴۹ کال د امریکا په نیوجرسي ایالت کې هغه دې نړۍ ته راغله، په ۱۹۷۱ کال په سینما کې هنري فعالیت پیل کړ.

د هغې لومړی سینمايي فلم د جولیا په نامه دی، چې په ۱۹۷۷ کال پکې لوبېدلې ده.

هغې ډېر ژر وکړای شو چې د رابرټ دونیرو (۱۹۸۷) او داستین هافمن (د کریمر پرضد کریمر، ۱۹۸۷) ترڅنګ شهرت ته ځان ورسوي، چې د لومړي ځل لپاره کریمر د کریمر پرضد جایزه یې وګټله.

د هغې له مشهورو فلمونو د مدیسن کانتي ګامونه، شیطان پرده اچوي، ماما میا او شک دي.

ګلن کلوز: البرټ نابز

شاید د فلمي هنرمندو ښځو په منځ کې د ګلن کلوز نوم هم له سټریپ وروسته د ډېرو سینمايي تماشاچیانو لپاره اشنا وي، چې د اوسکار جایزې په تمه ده.

هغه سږ کال د البرت نابز په رول کې د شپږم نوماند لپاره د جایزې مستحقه شوه.

خو وړاندې پنځه ځلې له جایزې اخیستو پرته تش لاس تللې ده.

هغې په (په نولسمه پېړۍ کې د ایرلنډۍ ښځې رول) فلم کې لوبېدلې ده، چې د نر رول یې هم لوبولی چې د شلو کالو لپاره پکې د یوه خدمتګار په رول کې کار کوي.

ګلن ګلوز د امریکا په کانتیکت ایالت کې په ۱۹۴۷ کال کې زیږېدلې ده، خو هنري فعالیت کې په ۱۹۸۱ کال کې پیل کړی.

په لومړیو فلمونو کې د لوبېدو له کبله د اوسکار جایزې ته د غوره لوبېدلې ښځې په توګه ونومول شوه.

وایولا دیویس: خدمتکار

ظاهراً په خدمتکاران فلم کې درې ښځینه لوبغاړې لوبېدلې دي، چې اوس د اوسکار جایزې په تمه دي.

په دغو ښځو کې وایولا دیویس هم ده، چې په ۲۰۰۸ کال کې هم په یوه بل فلم کې لوبېدلې ده.

په ۱۹۶۵ کال، د امریکا په جنوبي کارولینا ایالت کې دنیا ته راغله.

سینمايي فعالیت یې په ۱۹۹۶ کال پیل او لومړی د فرعي رول په توګه د فلمونو ستورې وه.

هغه د ۲۰۰۸ کال د (شک) په نامه فلم کې ښه وځلېده، چې له کبله یې د ګولډن ګلوب او اوسکار په څېر د معتبرو سینمايي جایزو ګټونکې شوه.

سږ کال بیا د خدمتکاران فلم کې اوسکار ته په تمه ده.

هغې په دې فلم کې چې داستان یې د۱۹۶۰ لسیزې د ميسي سي پي ژوند انځوروي، د تورپوستې خدمتګارې رول لري.

هغه په فلم کې له یوې سپین پوستې (اما استون) سره صمیمانه اړیکي جوړوي.

دا هغه لسیزه ده، چې د امریکا د تور پوستو او سپین پوټکو وګړو ترمنځ توپیر پالنه اوج ته رسېدلې وه.

روني مارا: د ښامار له خالوهنې سره نجلۍ

د اوسکار د جایزو تر ټولو د کم عمر لوبېدلې نجلۍ ده، دغه ۲۷ کلنه ستورې د امریکا به نیویارک کې زیږېدلې ده.

دا چې فلمي فعالیت یې په ۲۰۰۵ کال کې پیل کړ؛ خو وړاندې یې د تلوېزیوني سریالونو په ځينو برخو کې فرعي رول لوبولی دی.

په کابوس فلم کې لوبېدلې، او بیا مشهوره شوه.

خو تر ټولو مشهور فلم چې هغه پکې لوبېدلې ده، د ښامار له خالوهنې سره نجلۍ فلم دی.

ددې فلم له کبله یې څو جایزې هم ګټلې دي.

هغې په دې فلم کې د هکر رول لوبولی دی.

میشل ویلیامز: له مریلین سره زما اوونۍ

ویلیامز د درېیم ځل لپاره په اوسکار کې خپل بخت ازمايي.

هغه په لومړي ځل د بروکبک غرني فلم کې ولوبېده، او تېر کال ددویم ځل لپاره د عمګین ولنټاین په لیست کې د اوسکار د جایزې لپاره ونومول شوه.

هغه په ۱۹۸۰ کال د امریکا په مونتانا کې نړۍ ته راغله او سیمايي فعالیت یې وختي پیل کړ.

لومړی په تلوېزیوني سریالونو کې د فرعي کرکټر په توګه ولوبېده.

خو د مشهورېدو لپاره یې څو کاله وخت واخیست.

فلمي کتونکي وايي چې تر ۲۰۰۵ کال پورې د بروکبک غرنی فلم د هغې تر ټولو بریالی فلم دی.

ویلیامز سږ کال (له مریلین سره زما اوونۍ) فلم کې د هالیووډ د ۶۰ او ۱۹۵۰ کالونو په رول کې لوبېدلې، چې اوس یې اوسکار ته لار ومونده.

فلم د مونرو د ژوند یوه اوونۍ انځوروي، چې له لارنس الیویه سره لوبېدلې ده.