تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د روسیې اوکرایین جګړه؛ خېرسون کې بریدونو اووه تنه وژلي
د اوکرایین په سوېلي ښار خېرسون کې چارواکي وايي دغلته د روسیې هوايي بریدونو لږترلږه اووه تنه وژلي او لسګونه نور ټپیان دي.
په چاودنو کې د ښار د مرکزي سیمو د استوګنې او اداري ودانیو ښیښې ماتې شوې دي.
د اوکرایین ولسمشر ولادیمیر زېلېنسکي ویلي، په هغې سیمې کې هېڅ پوځي تاسیسات نشته.
خېرسون، یوازینی سیمه ییز مرکز دی چې د روسیې لخوا تر نیول کېدو وروسته، تېره میاشت د اوکرایین لخوا بېرته ونیول شو.
تر هغه وخت وروسته دا سیمه په بیا بیا د روسي ځواکونو لخوا په نښه شوې چې ډېنیپرو سیند بلې غاړې ته پروت دی.
تر برید وروسته په تصویرونو کې د ځمکې پر سر یو شمېر جسدونه، موټرونه او د اور په لمبو کې ویجاړې شوې ودانۍ ښکاري.
دا برید دقیقا پر اوکرایین د روسیې د یرغل لس میاشتې وروسته شوی دی.
د اوکرایین ولسمشر ولادیمیر زېلېنسکي په خپل ټیلیګرام چینل کې لیکلي، "ښايي ټولنیزې شبکې به دا عکسونه د حساسې منځپانګې په توګه خپاره کړي. خو دا کومه حساس منځپانګه نه ده، بلکې دا د اوکرایین او اوکراینیانو اصلي ژوند دی."
روسیې په وار وار په خپلو بریدونو کې د ملکي وګړو په نښه کول رد کړي دي.
څو ورځې وړاندې امریکا ته د ولسمشر زېلېسنکي د سفر پر مهال د امریکا ولسمشر جوبایډن ژمنه وکړه، چې د پرمختللي هوايي دفاعي سیسټم په ګډون به له اوکرایین سره د دفاع پیاوړي کولو کې خپلې مرستې روانې وساتي.
