تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
روسیه کې پر یوه پوځي روزنیز مرکز وسله وال برید؛ ۱۱ کسان وژل شوي
دوو وسله والو سړیو د شنبې پر ورځ اوکرایین سره پر پوله د روسیې بلګراد سیمه کې د پوځ یوه روزنیز مرکز کې ډزې کړې او لږترلږه ۱۱ کسان یې وژلي دي.
د روسیې دولتي خبري اژانس 'ریا' یوه رپوټ کې ویلي دغو سړیو د وسلو د تمرین پر مهال پر هغو کسانو ډزې کړې چې اوکرایین کې جنګېدو لپاره داوطلب شوي وو.
دې پېښه کې ۱۵ کسان ټپي شوي هم دي.
د روسیې دفاع وزارت ویلي بریدګر د پخواني شوروي اتحاد د یوه جمهوریت اتباع دي، خو په دې تړاو یې نور جزییات نه دي ورکړي.
رپوټ کې راغلي چې بریدګر د پېښې پر مهال وژل شوي دي.
ریا خبري اژانس د روسیې دفاع وزارت د یوې اعلامیې له مخې ویلي "ترهګرو له هغو کسانو سره د وسلو د روزنې پر مهال چې په خپله خوښه یې [اوکرایین کې] په ځانګړو پوځي عملیاتو کې د برخې اخیستلو لیوالتیا ښودلې وه، د دغه واحد پر پرسونل د وړو وسلو ډزې وکړې."
اعلامیه زیاتوي "د دغو ډزو پایله کې ۱۱ کسان مرګوني ټپیان شول. ۱۵ نور کسان چې ټپونه یې د اندېښنې وړ وو، روغتیايي مرکز ته ولېږدول شول."
د روسیې ولسمشر ولادیمیر پوتین تېره میاشت د اوکرایین جګړې لپاره د یوه ۳۰۰ زره کسیز ځواک د منظمېدو امر وکړ.
دغه ځواک له هغو کسانو جوړېږي چې پخوا یې اجباري عسکري خدمات ترسره کړي.
خو د دغه امر خلاف د روسیې لروبر یو شمېر کسانو لاریونونه وکړل او ځینې هڅه کوي چې له هېواده ووځي.
د روسیې دفاع وزیر سرګې شویګو د اکتوبر لومړیو کې وویل چې ۲۰۰ زره احتیاطي سرتېري وار له مخه راټول شوي دي.
