چارلس-درېيم په رسمي ډول د بریتانیا د نوي پاچا په توګه معرفي شو
د ملکې الېزابت-دویمې زوی چارلس نن (شنبه) د لندن په شاهي ماڼۍ سېنټ جیمز کې د یو لړ مراسمو په ترڅ کې په رسمي توګه د بریتانیا د نوي پاچا په توګه معرفي شو.
دا لومړی ځل دی چې د "پاچا اعلانولو شورا" دا رسمي غونډه، چې په ترڅ کې یې د بریتانیا خلکو ته د دوی نوی پاچا ورپېژني، پر ټلویزون په ژوندۍ بڼه خپرېږي.
که څه هم د ملکې له مړینې سره ښاغلی چارلس وارله مخه پاچا دی خو د شورا دا اعلان تشریفاتي بڼه لري.
په دې غونډه کې د بریتانیا ځینو مشرانو سیاسي کسانو، د لندن ښاروال او یو شمېر نورو لوړپوړو چارواکږ ګډون کړی و.
د بریتانیا بیرغ به د ۲۴ ساعتونو لپاره نوي پاچا ته د درناوي په موخه هسک وساتل شي او تر هغې وروسته به د ملکه الېزابت-دویمې د مړینې په ویر بېرته نیمه ځوړند کړل شي.
د بريتانيا نوي پاچا چارلس درېيم د خپلې مور ملکې الېزابت دويمې له مړينې وروسته پرون (جمعه) د بکېنګهم ماڼۍ څخه ملت ته وينا وکړه او په پيل کې يې خپلې مور ملکې الېزابت ته درناوی وړاندې کړې.
نوي پاچا وويل، ملکه الېزابت د هغه او د "ملت لپاره الهام بښوونکې وه" او له هغې څخه يې د خپلې کورنۍ او هېواد ته د خدمت لپاره مننه وکړه.
د بريتانيا ملکه الېزابت-دویمه، چهارشنبې ماسپښين مهال د بریتانیا د سکاټلنډ په بالمور سیمه کې مړه شوه.
نوي پاچا د خپلې مور د خدمت ژمنه تازه کړه او ويې ويل د هغې ژمنتيا هېڅکله له منځه نه ځي.
پاچا چارلس وويل، زوی به يې وېليم د وېلز شهزاده او د هغه مېرمن کترېن به د وېلز شهزادګۍ وي. له دې سره به وېليم د پاچا وليعهد وي.
نوموړي د بل زوی شهزاده هاري يادونه هم وکړه او د هغه او د مېرمنې مېګهن لپاره یې هم مينه څرګنده کړه.
پاچا چارلس او مېرمنې يې د بکېنګهم ماڼۍ بهر خلکو ته ښه راغلاست ووايه.
ټاکل شوې تر دوو اوونیو په کمه موده کې به د ملکې د جنازې دولتي مراسم په ویسټ مېنسټر ابې کې ترسره شي. د جنازې کره ورځ به د بکېنګهم ماڼۍ له لوري اعلان او تایید شي.
د نړۍ د بېلا بېلو هېوادونو مشران به د ملکې د جنازې په مراسمو کې د ګډون لپاره د بریتانیا شاهي کورنۍ ته ځانونه ورسوي. د بریتانیا سیاسي کسان او پخواني لومړي وزیران به هم په دغو مراسمو کې ګډون وکړي.
د برتانیا ملکه دویمه الیزابت په خپلې اوږدې واکمنۍ کې په دې ستایل شوې چې خپله دنده یې په ښه توګه ترسره کړې او خپل ژوند یې د پاچاهۍ وقار ساتلو او خپلو خلکو ته وقف کړی و.
