هغه سړی 'اتل' بلل شوی، چې شپږ ساعته یې د یوه بانک مسوولین یرغمل کړي وو
د عکس سرچینه، Reuters
په لبنان کې هغه وسله وال سړی ګڼ شمېر کسانو اتل بللی، چې تر شپږ ساعتونو پورې یې بیروت کې یو بانک یرغمل کړی و. لبنان کې د سخت اقتصادي کړکېچ له کبله بانکونو سخت اصول وضع کړي دي.
د اې ایف پي خبري اژانس په رپوټ کې ویل شوي، دا وسله وال سړی له ټوپک سره بانک ته ننوتی و، پټرول یې شېندلي او د روغتون لګښتونو پوره کولو لپاره یې له بانکه خپلې پیسې غوښتې. د دې سړې دا کړنه د ده لپاره د یو شمېر کسانو د ملاتړ لامل شوه، چې د بانک مخې ته راټول شول او شعارونه یې ورکول: ''ته زموږ اتل یې. ''
د ایل بي سي خبري شبکې په رپوټ کې ویل شوي، دا وضعیت د بانک مسوولینو او وسله وال سړي تر منځ د مذاکراتو له بریا وروسته په سوله ییز ډول پای ته ورسېد. د رپوټ له مخې بانک دې سړي ته د ده له خپل بانکي حسابه د ۳۵ زره امریکايي ډالرو ورکولو هوکړه وکړه.
وروسته د پولیسو په بدرګه یرغمل شوي کسان او وسله وال د فدارل بانک له حمرا واټ څانګې ولېږدول شول، خو چارواکو نه دي ویلي چې دا سړی به محاکمه شي او که نه. د ایل بي سي رپوټ کې ویل شوي، د مشکوک سړي ځینې کورنۍ غړي په روغتون کې بستري دي او نغدو پیسو ته یې سخته اړتیا درلوده.
د دې سړي ورور خبریالانو ته وویل: ورور مې په بانک کې ۲۱۰ زره ډالره سپمولي، خو اوس یې د روغتون لګښت پرې کولو لپاره ۵۵۰۰ ډالرو ته اړتیا درلوده. په ۲۰۱۹ کال کې د خلکو پر بانکي حسابونو له سخت کنټرول عملي کېدو وروسته په لبنان کې غوسه ډېره شوې.
له دې هېواده بهر ته د پیسو پر استولو هم محدودیتونه لګول شوي دي. لبنان دا مهال د اوسني وخت له خورا یوه سخت اقتصادي بحرانه تېرېږي، چې له کبله یې د ژوند اړتیاوو پوره کول یوه ګرانه چاره ده او د غنمو او درملو په څېر اړتیاوړ توکو بیې پکې خورا لوړې شوې دي.
د لبنان ځايي پولي واحد ۹۰ سلنه ارزښت له لاسه ورکړی او د ملګرو ملتونو په وینا له پنځو لبنانیانو څلور یې به بیوزلۍ کې ژوند کوي.
