پاکستان کې نن نوی لومړی وزیر ټاکل کېږي؛ د عمران خان سکرتر ممنوع الخروج اعلان شوی
د عکس سرچینه، Tolo News/Getty Images
د پاکستان مخکیني لومړي وزیر عمران خان پر ضد د دې هېواد پارلمان کې د بې باورۍ تحریک له کامیابېدو وروسته نن دوشنبه د پاکستان لپاره نوی لومړی وزیر ټاکل کېږي.
اپوزېسیون ګوندونو د پاکستان مسلم لیګ (ن) ګوند یو مشر میا محمد شهباز شریف او د عمران خان پاکستان تحریک انصاف ګوند د بهرنیو چارو پخوانی وزیر شاه محمود قریشي د لومړي وزارت مقام لپاره نومولي دي.
د پاکستان قامي اسمبلۍ یا جرګه به له ځايي وخت سره سم ماسپښین دوې بجې د درېویشتم لومړي وزیر ټاکلو لپاره غونډه پیل کړي.
بل لور د پاکستان فدرالي تحقیقاتي ادارې (ایف ای اې) د مخکیني لومړي وزیر عمران خان یو شمېر مهمو سلاکارانو نومونه په هغه لیست کې شامل کړي، چې له هېواده د وتلو اجازه نه لري. دې کې د شهبازګل، شهزاد اکبر، سکرتر اعظم خان او ډاکتر رضوان نومونه شامل دي.
د پاکستان مسلم لیګ (ن) ګوند مرستیال عمومي منشي عطاالله تارړ په یوه ټویټر پیغام کې په دې دې هکله وايي: ''اوس دا کسان نه شي کولای له هېواده بهر ته وتښتي، له وخته مې دا خبره کوله چې د غچ اخیستنې، دروغ او فریب انجام ښه نه وي. ''
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
د عمران خان د پلویانو مظاهرې
د پاکستان قامي اسمبلۍ له خوا د پخواني لومړي وزير عمران خان پر ضد نه باور له رايو ورکولو او د هغه له واکه لېرې کېدو وروسته د پاکستان په بېلابېلو برخو کې د نوموړي د پلويانو له خوا مظاهرې او احتجاجونه شوي دي.
عمران خان وړاندې په خپله وينا کې له خلکو غوښتي وو چې د اپرېل پر لسمه د ماښام له لمانځه وروسته په خپلو ښارونو کې لاريونونه وکړي.
د خيبر پښتونخوا په پېښور کې هم يو شمېر خلک د احتجاج په پار د پرېس کلب مخې ته راټول شوي وو.
مخکیني لومړي وزیر عمران خان په یوه ټویټر پیغام کې د احتجاجونو له ویډیو سره لیکلي: ''ما د هېواد په تاریخ کې دومره ډېر خلک نه وو لیدلي، چې د غلو وارد شوي حکومت ردولو لپاره له خپل بهر ته راوتلي وي. ''
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
د پاکستان قامي اسمبلۍ غړو تېره شپه له اوږد او لانجمن پړاو وروسته عمران خان بېواکه کړ.
د دې جرګې له ۳۴۲ وکیلانو څخه ۱۷۴ تنو د هغه خلاف د "نه باور رایه" وکاروله.
له عمران خان د واک اخیستلو لپاره رایې اچونې ته تر هغې وروسته لار هواره شوه چې د قامي اسمبلۍ مشر اسد قیصر استعفاء وکړه.
د هغه تر استعفاء وروسته د مسلم لیګ (ن) ګوند غړي ایاز صادق د اسمبلۍ مشري په غاړه واخیسته.
عمران خان د پاکستان ۲۲ م لومړی وزیر و. هغه درې کاله او ۸ میاشتې حکومت وکړ.
د کرېکټ دغه پخواني لوبغاړي په ۱۹۹۶ کال کې د پاکستان تحریک انصاف ګوند بنسټ کېښود، د ۲۰۱۳ کال تر ټاکنو وروسته یې خیبرپښتونخوا کې خپل ایالتي حکومت جوړ کړ او د ۲۰۱۸ کال ټولټاکنو کې یې بیا د مرکزي حکومت واګي ترلاسه کړل.
هغه که څه هم د لومړي وزارت څوکۍ ته د قامي اسمبلۍ د باور په رایه رسېدلی و، خو دا د پاکستان تاریخ کې لومړی ځل شو قامي اسمبلۍ کې د يوه لومړي وزير پر ضد د "نه باور رايې" بهیر بريالی کېږي.
