تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
چین پر ځینو امریکايي چارواکو او بنسټونو بندیزونه لګولي
چین ویلي چې په هانګ کانګ کې پر ځینو چینايي چارواکو د واشنګټن د وروستیو بندیزونو په غبرګون کې یې د امریکا پر ځینو چارواکو او امریکايي بنسټونو بندیزونه لګولي دي.
د بیجینګ په دې بندیزونو کې د امریکا د سوداګرۍ پخوانی وزیر ویلبور روس هم دی.
د بندیزونو دا لړۍ وروسته تر هغه پیل شوه، چې د امریکا د بهرنیو چارو وزارت یوه مرستیاله وینډي شرمان په وروستیو ورځو کې بیجینګ ته تللې وه.
امریکا په هانګ کانګ کې پر ځینو چارواکو بندیزونه لګولي وو چې ویل یې هلته د امنیتي وضعیت په خرابولو کې لاس لري.
واشنګټن ویلي وو چې په هانګ کانګ کې به د خطرونو په ډېرېدو پر ځینو شرکتونو هم بندیزونه ولګوي.
تېر کال چین په هانګ کانګ کې د دیموکراسۍ په ملاتړ د لاریونونو ځپلو لپاره د ملي امنیت قانون پلی کولو ته اړ شو.
په هانګ کانګ کې دا قانون هر هغه کس مجرم ګڼي چې د بېلتونپالنې او تخریب کارونه کوي او له بهرنیو اړخونو سره خواخوږي پالي او سزا یې عمري بند کېدی شي.
د چین د بهرنیو چارو وزارت د جمعې په ورځ وویل، "د امریکا وروستيو بندیزونو په هانګ کانګ کې د سوداګرۍ چاپېریال اغېزمن کړی او د نړیوالو اړیکو نړیوال قانون او اساسي معیارونه یې تر پښو لاندې کړي دي."
ددغه وزارت په خبرپاڼه کې راغلي، د بیجینګ بندیزونه به تر اوو اونیو دوام ومومي.
د ټرمپ په اداره کې د امریکا د سوداګرۍ وزیر روس له هغو چینايي شرکتونو سره د راکړې ورکړې په لیست کې دی چې له امریکايي شرکتونو سره د راکړې ورکړې په چارو یې بندیز لګول شوی او په ناقانونه توګه فعالیتونه کوي.
په دې شرکتونو کې د ټیکنالوجۍ او معلوماتو هواوي او زیډ ټي چینايي شرکتونه هم دي.
د بجینګ په بندیزونو کې د بشر حقونو د څار سازمان د چین د چارو مشر سوفي ریچرډسن، د امریکا- چین د اقتصادي او امنیتي چارو د ارزونې د جرګګۍ مشره کارولیان بارتولومیو او د جمهوریپال نړیوال انستېتیوت مشر ادم کینګ هم دي.
د سپینې ماڼۍ د رسنیو مشرې جېن ساکي ویلي: "امریکا د چین په غبرګون هېڅ اندېښنه نه لري".
د چین او امریکا اړیکې د ډونلډ ټرمپ د ولسمشرۍ پرمهال تر ټولو ډېر ترینګلي شول، چې لاهم د کوویډ-۱۹ د اصلي پیلېدو، د بشر حقونو د ځینو مسلو او الکترونیکي امنیت په تړاو د ناندریو له کبله د دواړو هېوادونو اړیکې ترینګلې دي.
د روانې اونۍ په وروستیو کې به د امریکا د بهرنیو چارو وزارت مرستیاله وینډي شرمان د دواړو هېوادونو د اړیکو رغولو لپاره چین ته ولاړه شي.
