تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
فېسبوک استرالیا کې پر خبري منځپانګې بندیز لګولی
فېسبوک شرکت په استرالیا کې خپلو کارنو ته د هر ډول خبري موضوع د خپرولو په اړه خبرداری ورکړی دی، چې دې کار یې اساسي معلوماتو ته د خلکو د لاسرسي په اړه اندېښنه راپورته کړې ده.
استرالیاییان چې د پنجشنبې په ورځ راویښ شول، ویې لیده چې پر فېسبوک ټول کورني او بهرني خبري وېبسایټونه نه شي پرانیستلی.
پر ځینو حکومتو وېبپاڼو هم بندیز لګول شوی، لکه د روغتیا او بېړنیو پېښو اړوندې وېبپاڼې- خو د فېسبوک چلوونکو وویل دا کار په تېروتنه شوی.
د استرالیا حکومت ویلي دا بندیز د فېسبوک "ریښتینولي" ګواښي.
له استرالیا بهر هم ګڼ کسان فېسبوک کې د استرالیا ورځپاڼو ته لاسرسی نه لري.
د فېسبوک دا پرېکړه په استرالیا کې د هغه وړاندیز شوي قانون په غبرګون کې شوې چې وايي د ټیکنالوجۍ مخکښان باید د خبرونو د منځپانګو په بدل کې پیسې ورکړي.
د ګوګل او فېسبوک په څېر شرکتونو لانجه وکړه چې یاد قانون د انټرنېټ د کار د څرنګوالي ښکارندويي نه کوي او په نا عادلانه ډول یې "سزا" ټاکلې ده.
د استرالیا حکومت ویلي، د چارشنبې په ورځ پارلمان کې د تایید شوي دغه قانون د پلې کولو لپاره به لاس په کار شي.
د استرالیا د مخابراتو وزیر پاول فلېچر "اې بي سي" تلوېزیون ته ویلي: "فېسبوک باید ښه فکر وکړي چې دا کار یې شان او شوکت ته زیان رسوي".
فېسبوک شرکت ویلي، تېر کال یې له استرالیايي خپرندویانو سره کارنو (کاروونکو) ته د دوی د منځپانګو رسولو سره د ۴۰۷ میلیون استرالیايي ډالرو (۳۱۶ امریکايي ډالرو) په ګټلو کې همکاري کړې ده، خو د فېسبوک لپاره له خبري منځپانګو ورتلونکې ګټه "ډېره کمه" ده.
د شرکت سیمه ییز مشر ویلیم ایسټن ویلي، دا قانون فېسبوک ته د هغې منڅپانګې له کبله سزا ورکوي چې فېسبوک کې هېڅ نه غواړي.
