تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د ناپليون زمانه کې وژل شوي پوځيان دوه پېړۍ وروسته خاورو ته وسپارل شول
د فرانسې او روسيې د هغو پوځيانو مړي چې له مسکو څخه د ناپليون د وتلو پر مهال مړه شوي وو د يو لړ مراسمو په ترڅ کې د روسيې په لوېدېځ کې بيا خاورو ته وسپارل شول.
د دغو ۱۲۰ پوځيانو سره درې مېرمنې او درې ماشومان هم خښ شول.
د دې پوځيانو هډوکي دوه کاله دمخه د فرانسوي او روسي اثار پېژندونکو د يوې ډلې له خوا موندل شوي وو.
په ۱۸۱۲ کال کې له مسکو د ناپيلون بېرته په شاتګ د ده له لوري پر روسيې د فرانسې تېري ته د پای ټکی کېښود.
د ناپليون لوی پوځ ګړندی پرمحتګ وکړ، مسکو يې ونيو خو هېڅکله يې پرېکړه کوونکې بريا ترلاسه نه کړه. دی بېرته له مسکو په شا شو او پوځونه يې د روسيې سړې هوا، لوږې او د روسي پوځونو له خوا چريکي بريدونو سره مخ شول.
د پوځيانو مړي يې د وايزما ښار د عيسويانو په يوه مذهبي ځای کې په کنګل حالت کې خښ شول.
داسې اټکل کیږي چې ټول د وایزما د جګړې پرمهال هغه وخت وژل شوي وي چې د ناپلیون بېرته په شاتګ وکړ.
داسې انګېرل کېږي چې دغو دريو مېرمنو د پوځيانو لپاره خواړه او لومړنۍ مرستې چمتو کولې او هلکان د پوځي ډول وهونکو په توګه کارېدل.
