'فرانسه کې د وژل شوي ښوونکي قاتل له زده کوونکو د هغه په هکله پوښتنې کړې وې'

فرانسه کې ترهګرۍ ضد چارواکي وايي، هغه سړي چې په دغه هېواد کې یې له یوه ښوونکي سر غوڅ کړی، لومړی له ښوونځي بهر د هغه انتظار کاوه او له زده کوونکو یې پوښتل چې ور ویې ښيي.

بیا دغه سړي پر خواله رسنیو د وژل شوي ښوونکي ۴۷ کلن سامویل پاتې تصویرونه خپاره کړي، چې خپلو زده کوونکو ته یې د اسلام پیغمبر محمد (ص) کارټون ښوولی و.

بریدګر له وژل کېدو مخکې پر پولیسو د بادي ټوپک ډزې هم کړي.

د فرانسوي رسنیو په رپوټونو کې ویل شوي، وژل شوي ښوونکي ته له مخکې ګواښونه شوي وو.

د عدلي او قضايي چارواکو له قوله ویل شوي، د پېښې په تړاو نهه کسان نیول شوي دي.

ویل کېږي، نیول شویو کې د هغه ښوونځي یوه زده کوونکي مور، پلار هم شامل دي، چې وژل شوي ښوونکي په کې دنده درلوده.

د جمعې پر ورځ پولیسو د پېښې په ځای کې د ښوونکي قاتل په ډزو وواژه.

پولیس وايي، بریدګر یو ۱۸ کلن چیچنايي توکمه ځوان و.

پېښه په فرانسه کې پر چارلي ابدو نومې مجلې د ۲۰۱۵ کال یوه برید محاکمې سره هممهاله شوې. پر یاده مجله د کارټون خپرولو له کبله برید شوی و.

ماکرون د ښوونکي سر غوڅول "اسلامي ترهګريز برید" بللی

د فرانسې ولسمشر ایمانویل ماکرون وايي، دغه برید کې د 'اسلامپالو ترهګریز برید ' ټولې نښې نښانې شته او ښوونکی د 'فکر او بیان ازادۍ ورزده کولو ' له کبله وژل شوی دی.

د ښوونکي له وژل کېدو څو ساعته وروسته د پېښې ځای کې د خبرو پر مهال نوموړي پر ملي یوالي ټینګار وکړ:

''دوی به پر موږ غالب نه شي، دوی به موږ تقسیم نه کړي. ''

فرانسوۍ رسنۍ وایي، وژل شوي ښوونکي څه موده وړاندې په ټولګي کې خپلو زدکوونکو ته د اسلام د پیغمبر محمد (ص) کارتونونه ښودلي وو.

پېښه له ځایي وخت سره سم مازدیګر پنځه بجې شوې او د ترهګرۍ ضد څارنوال ته سپارښتنه شوې چې د دې ترهګریز برید په اړه پلټڼې پیل کړي.

ویل کېږي چې د فرانسې د کورنیو چارو وزیر جېرالډ ډارمنېن، چې مراکش ته روان و، د دې پېښې له کبله بېرته هېواد ته ستون شوی.

د (اې اېف پي) خبري اژانس د پولیسو او څارنوال له خولې ویلي چې له وژل شوي ښوونکي سر پرې کړل شوی دی.

په سیمه کې څه پېښ شول؟

رپوټونه وایي، یو سړي چې لویه چړه (ساتول) یې په لاس کې و پر دې ښوونکي برید وکړ او سر یې ترې پرې کړ.

له برید وروسته بریدګر له سیمې وتښتېد، خو ځایي خلکو سملاسي پولیسو ته حال ورکړ او شېبه وروسته امنیتي کسان د پېښې ځای ته ورسېدل.

لږ وروسته پولس او بریدګر د اېرګني په سیمه کې سره مخامخ شول. رپوټونه وایي چې بریدګر پولیسو ته هم ګواښونه پیل کړل، او له همدې کبله پولیسو په ډزو وواژه.

وروستي رپوټونه وایي چې د پېښې سیمه د پولیسو لخوا کلابنده شوې ده او پلټنې روانې دي. پولیسو له خلکو غوښتي چي سیمې ته ورنشي.

دا برید داسې مهال کېږي چې فرانسه کې په ۲۰۱۵ کال کې د چارلي هېبډو مجلې پر دفتر د برید په تړاو د یو شمېر تورنو کسانو محاکمه روانه ده.

چارلي هېبډو مجلې باندې برید وروسته له هغه وشو چې د اسلام د پیغمبر محمد (ص) کارتونونه یې خپاره کړل.

یادې مجلې څه موده وړاندې پر خپل دفتر د برید د پنځم تلین په مناسبت هماغه کارتونونه یو ځل بیا خپاره کړل.

درې اوونۍ وړاندې یوه پاکستاني کس هم د یادې مجلې دفتر نه بهر پر دوو کسانو برید وکړ او ټپیان یې کړل.