تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پاکستان: دین ته په سپکاوي تورن پروفیسر محاکمه کېږي
- Author, خدای نور ناصر
- دنده, بي بي سي، اسلام اباد
مذهب ته د سپکاوي په تور د نیول شوي پوهنتوني استاد قضیې اورېدل، بیا د پاکستان ملتان کې پیل شوي دي. جنید حفیظ له ۲۰۱۳ کال راهیسې پر خواله رسنۍ د اسلام پیغمبر ته د سپکوونکو مطالبو د خپرولو په تور بندي دی.
تر اوسه د ده یو مدافع وکیل هم په دې پلمه وژل شوی چې ولې د اسلام د سپکوونکي کس دفاع کوي.
بشري فعالان اسلام ته د سپکاوي قانون په پاکستان کې د هغو افراطیانو وسله بولي چې د بل آندو د غلي کولو لپاره کارېږي.
د اسلام پیغمبر ته د سپکاوي په قضیه کې به د جنید حفیظ پرضد اووه کاله وروسته یو ځل بیا دلایل اورېدل کېږي چې تر اورېدلو وروسته به یې قاضي د ښاغلي حفیظ په حق کې یا یې پرضد پرېکړه کوي.
جنید حفیظ د ملتان بهاوالدین ذکریا پوهنتون کې د انګلیسې ادب استاد و چې په ۲۰۱۳ کال کې د ځینو کسانو لخوا تورن شو چې پر خواله رسنۍ یې د اسلام پیغمبر ته سپکاوی کړی.
نوموړي هماغه مهال د مارچ په میاشت کې ونیول او محاکمه یې پیل شوه.
په ۲۰۱۴ کال کې وسله والو کسانو د جنید حفیظ وکیل راشد رحمان په خپل دفتر کې په دې خاطر وواژه چې ولې د ښاغلي حفیظ دفاع کوي.
له هغه وروسته د جنید حفیظ یو بل وکیل شهباز ګورماني ځکه له دې قضیې لاس په سر شو چې ویل یې ګواښونه ورته کېږي.
اوس د هغه وکالت یو دریم وکیل اسد جمال کوي. د جنید حفیظ په محاکمه کې تراوسه شپږ تنه قاضیان هم بدل شوي دي.
مذهب ته سپکاوي په پاکستان کې هغه جرم دی چې پرې د تورنو کسانو له وکالت نه اکثراً وکیلان ډډه کوي.
نیوکه کوونکي وايي په پاکستان کې مذهب ته د سپکاوي ضد قانون نه تر ډېره د شخصي ګټو او غچ اخیستلو لپاره کار اخیستل کېږي او له مخې یې ډېر ځله بي ګناه کسان مذهب ته په سپکاوي تورن شي.
ډېر ځله هغه کسان په پاکستان کې وژل کېږي چې مذهب ته په سپکاوي تورن شي.
له ۱۹۹۰ کال راپدیخوا تراوسه پنځوس کسان په پاکستان کې مذهب ته د سپکاوي په تور وژل شوي چې وروستې پېښه یې په خېبرپښتونخوا کې د عبدالولي خان په پوهنتون کې د نورو محصلینو له خوا د مشال خان د وژلو وه.
