کشمیر: د هندي او پاکستاني پوځیانو نښته کې د مرګژوبلې ادعاوې

پاکستان کې پوځي چارواکي وايي، د هندي او پاکستاني پوځیانو تر منځ یوه نښته کې درې پاکستاني پوځیان وژل شوي دي.

د پاکستاني پوځ رسنیز دفتر ادعا کوي چې ځوابي برید کې پنځه هندي پوځیان وژل شوي او یو شمېر نور ټپیان شوي دي.

بل لور ته د هند اي این ای خبري اژانس پر ټویټر د هندي پوځي چارواکو له قوله د پاکستان دغه ادعا رد کړې چې ګواکې د کشمیر جلا کوونکې کرښې (ایل او سي یا لاین اف کنټرول) اوږدو کې د متبادلو ډزو لړ کې هندي پوځیان وژل شوي دي.

د هندي رسنیو په رپوټونو کې د هندي پوځي چارواکو له قوله ادعا شوې چې پونچ سیمه پاکستاني پوځیانو له اوربنده سرغړونه کړې.

له دې مخکې د هند لومړي وزیر نرېندرا مودي ویلي و، د کشمیر ایالت د ځانګړي حیثیت ختمولو پرېکړه به د دې سبب شي چې د دې سیمې پخوانی ویاړ بېرته را ژوندی شي.

د پنجشبنې پر ورځ د هند د خپلواکۍ ورځې مراسمو کې لومړي وزیر مودي وویل، کشمیر به د هند په پرمختګ کې مهم رول ولوبوي.

نوموړي زیاته کړه، د اساسي قانون ۳۷۰مې مادې، چې کشمیر ایالت ته یې ځانګړی حیثیت ورکړی و، په دې ایالت کې فساد ته لاره هواره کړې وه.

خو لومړي وزیر په خپلو خبرو کې په کشمیر کې روان وضعیت، ګرځ بندیز او د مخابراتي شبکو بندښت ته هېڅ اشاره ونکړه.

د پاکستان لومړي وزیر عمران خان پرون چارشنبه د خپل هېواد د خپلواکۍ ورځې مراسمو کې د کشمیر په اړه د هند حکومت وروستی ګام وغانده.

نوموړي وویل، د نړۍ په هر دریځ به د کشمیر مسئله را پورته کوي او د دې وضعیت پړه به د هند پر غاړه وي.

هند لومړي وزیر که څه هم د خپل پاکستاني سیال د خبرو ځواب ورنکړ، خو په کور د ننه یې هغه کسان وغندل چې د کشمیر پر موضوع سیاست کوي.

نوموړي وویل، د ده حکومت هغه څه وکړل چې په تېرو ۷۰ کلونو کې چا نه شو کولای، ځکه له پخوانیو حکومتونو او سیاستوالو سره د خپل راتلونکي غم و.

د هند تر ولکې لاندې کشمیر کې له تېرې یوې اونۍ راهیسې وضعیت تاوجن دی او مخابراتي شبکې بندې دي.

له ګرځبندیز سره سره په ځینو سیمو کې د هند حکومت د وروستي ګام پر ضد احتجاجونه شوي دي.

د کشمیر ځینې مهم سیاستوال هم له تېرو څو وروځو راهیسې په خپلو کورونو کې نظر بند دي.

ډېری کشمیریان اندېښنه لري چې د نرېندرا مودي حکومت غواړي په دې ګام سره د کشمیر سیاسي او توکمیز جوړښت بدل کړي او په دې ایالت کې هندوان په اکثریت بدل کړي.

خو واکمن حکومت وایي، د کشمیر د ځانګړي حیثیت ختمولو موخه دا ده چې یاد ایالت په پاتې هند ورګډ شي او د نورو ایالتونو په څېر له هر ډول اسانتیاو ګټه پورته کړي.

د پنجشنبې پر ورځ د لومړي وزیر مودي وینا که څه هم پر کشمیر ور ټوله وه، خو دا مهم اعلان یې هم وکړ چې هند به په لومړي ځل د لوی درستیز پوست رامنځته کوي.

دا لوی درستیز به د هند د ځمکني، هوایي او سمندري پوځ مشري پر غاړه ولري.