تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
داسې لرغونی توتي چې یو متر دنګ و
یوه نوې څېړنه کې ویل شوي، نژدې ۱۹ میلیونه کاله پخوا نیوزیلنډ کې داسې توتیان کښته پورته کېدل چې دنګوالی یې نژدې یوه متر ته رسېده.
څېړونکي وايي، د دغه توتي ونه د یوه درمیانه ونه لرونکي انساني د ونې نیمايي وه. اوس د دغه لوړ دنګ توتي هډونه د نیوزیلنډ سنټ بتان سیمه کې موندل شوي دي.
کارپوهان د دغه توتي ونې او وزن ته په کتو سره وايي، ښايي د اوسنیو مرغانو غوندې الوت به یې نه شو کولای او خوراک به یې غوښه وه.
دغه څېړنه د (ژورنال بیولوژۍ لیکونه) نومې خپرونه کې چاپ شوې او وايي، د دغه مرغه وزن تر اووه کیلو ډېر و او کارپوهان باوري دي چې له (کاکاپو) نومي توتي هم لوړ دنګ و، چې تر اوسه تر ټولو لوی توتي بلل کېده.
مخکې داسې ګومان کېده چې دا د یوه باز یا هیلۍ هډونه دي او له همدې ګومان سره تر ۱۱ کلونو پورې په سړه خونه کې ساتل شوي وو، خو وروسته د لرغونپوهانو یوې ډلې له بیا ارزونې وروسته معلومه شوه چې د توتي هډونه دي.
نیوزیلنډ کې د لرغونو مرغانو هډونو موندل نوې خبره نه ده. دغه هېواد کې له دې مخکې د (موا) نومي مرغه پاتې شوني موندل شوي وو، چې اوس د ځمکې له سره ورک شوی او باور کېږي چې ونه یې له درې متره هم لوړه وه او درې اعشاریه شپږ سانتي مترو ته رسېده.
سنټ بتان سیمه چې د دغه مرغه هډونه پکې موندل شوي، ویل کېږي له ۲۳ میلیونه تر پنځه اعشاریه درې میلیونه کاله پورې د لرغونې مایوسین زمانې ژویو او مرغانو پریمانه هډونه پکې موندل کېږي.
