تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
امریکا: جنګي بېړۍ ته څېرمه مو بې پیلوټه ایرانۍ الوتکه ویشتلې
ولسمشر ترمپ وايي، د امریکا سمندري جنګي بېړۍ په خلیج کې د ایران یوه پوځي بې پيلوټه الوتکه ویشتلې ده.
ټرمپ وايي، د یو اېس اېس بوکسر جنګي بېړۍ د پنجشنبې په ورځ وروسته تر هغه "دفاعي اجرآت" وکړل، چې یوه بې پیلوټه الوتکه بېړۍ ته ۹۱۴ متره نژدې شوه.
په تېره جون میاشت کې ایران په سیمه کې د امریکا یوه پوځي بې پیلوټه الوتکه وغورځوله.
د ښاغلي ټرمپ په وينا هرمز تنگي کې د ايرانۍ بې پيلوټې الوتکې د نسکورولو اقدام دفاعي و. ايراني ډرون د نوموړي په خبره امريکايۍ بېړۍ ته ډېر نژدې شوى و.
ولسمشر ټرمپ چې سپينې ماڼۍ کې يې خبريالانو سره خبرې کولې وويل ايراني بې پيلوټې الوتکې د يو. اېس. اېس. بوکسر په نامه امريکايي پوځي بېړۍ او عملې ته يې گواښ پېښ کړى و:
"بوکسر بېړۍ د ايراني ډرون پر ضد دفاعي گام پورته کړ چې ورته ډېر نژدې شوى و. د شا وخوا نهه سوه مترو واټن کې، د بېرته ورگرځېدو گڼې غوښتنې يې هم له پامه غورځولې وې. د بېړۍ او دعملې خونديتابه يې گواښه. ډرون سملاسي نسکور شو. امريکا د خپلو گټو، تاسيساتو او د خپل پرسونل د دفاع حق ځان لپاره خوندي کوي، او پر نورو ملتونو غږ کوي چې د تگ راتگ د ازادۍ او نړيوالې سوداگرۍ پر وړاندې د ايران د خنډ ولاړولو هڅې وغندي."
ولسمشر ټرمپ همداراز پر نورو هېوادونو غږ وکړ چې راتلونکې کې له هرمز تنگي د خپلو تېرېدونکو بېړيو خونديتابه لپاره له امريکا سره کار وکړي.
د هرمز په تنگي کې د ايرانۍ بې پيلوټې الوتکې د نسکورېدو خبر داسې مهال مخې ته راځي چې سيمه کې ترينگلتيا وار له مخه ډېره ده.
د ایران غبرګون
ایراني پوځي او دولتي چارواکو تر اوسه د ډرون الوتکې د ویجاړېدو په اړه مالومات نه دي ورکړي، خو د ایران د بهرنیو چارو وزیر محمد جواد ظریف چې دا مهال نیویارک کې دی، د ملګرو ملتونو مرکزي دفتر کې خبریالانو ته وویل: "موږ هېڅ مالومات نه لرو چې کومه بې پیلوټه الوتکه مو له لاسه ورکړې وي".
ايران تېره يکشنبه د پاناما يوه بېړۍ ونيوله چې وايي يو ميليون ليتر تيل يې قاچاقول، خو امريکا د ايران دا کړنه غندلې او د ټانکري بېړۍ د سملاسي پرېښولو غوښتنه يې کړې.
ايران تېره مياشت يو امريکايى ډرون چې په وينا يې د ايران هوايي حريم ته ننوتى و نسکور کړ، خو امريکايي چارواکو وويل دغه امريکايۍ بې پيلوټه وسيله په نړيوالو اوبو کې وه.
تېر مې او جون کې د عمان په خليج کې پر دوو تېل لېږدونکو بېړيو د شوي بريد پړه هم پر ايران اچول شوې وه خو ايران دغه تورونه رد کړي و.
