تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
لیبیا کې د کډوالو پر پنډغالي هوايي برید ۴۰ کسان وژلي
د لیبیا په طرابلس کې د کډوالو پر یوه پنډغالي هوايي برید لږ تر لږه ۴۰ کسان وژلي او شاوخوا ۸۰ نور ژوبلېدلي دي.
د لیبیا مرکزي دولت دا برید د خلیفه حفتر ځواکونو کار بللی خو هغوی دا تور رد کړی دی. ډېری وژل شوي افریقايي کډوال دي.
په ورستیو کلونو کې لیبیا له افریقا اروپا ته د کډوالۍ یوه له اصلي لارو وه.
لیبیا په ۲۰۱۱ کې د معمر القذافي له پرځېدو او وژل کېدو وروسته د پراخه تاوتریخوالي شاهد دی او دا هېواد د انسان قاچاق کوونکو لپاره په امن ځای بدل شوی دی.
د لیبیا د بېړنیو خدمتونو ویاند اسامه علي اې اېف پي خبري اژانس ته ویلي چې د تاجوراء سیمه کې د کډوالو په دغه کمپ کې شاوخوا ۱۲۰ کډوال ساتل کېدل چې دده په خبره پر کمپ هوايي برید کې ټول مېشت کډوال اغېزمن شوي دي.
د وژل شویو شمېر وروستی نه دی او ویل کیږي چې له څېړنو سره به د وژل شویو شمېر له څلوېښتو لوړ شي.
د لیبیا د مرکزي دولت لومړي وزیر فیاض السرا چې ملګري ملتونه یې په رسمیت پېژني د جنرال خلیفه حفتر ځواکونه چې د پلازمېنې طرابلس د نیولو لپاره له مرکزي حکومت سره په جګړه بوخت دي، ددې برید مسؤول بللي.
جنرال حفتر دوه ورځې وړاندې اعلان کړی و چې په طرابلس کې پر ځینو هدفونو هوايي بریدونه کېدونکي دي چې په وینا یې وضعیت له "ستړې کوونکې جګړې" بهر شي.
خو سره له دې د لیبیا د پوځ ویاند ددې برید مسؤولیت پر غاړه نه دی اخیستی.
ډاکټر خالد بن عطايي چې د برید سیمې ته ورغلی و بي بي سي ته ویلي: "پنډغالی ویجاړ شوی و، خلکو ژړل، ډېر وحشتناک حالت و."
اروپا ته د تلو په نیت زرګونه کډوال د لیبیا په دولتي کمپونو کې ساتل کیږي چې تر ډېره د جګړې په لومړۍ کرښه کې دي.
په دې کمپونو کې د ناوړه وضعیت په اړه د بشري حقونو دفاع بنسټونو وار وار اندېښنه ښودلې.
ملګرو ملتونو هم ددې برید په اړه اندېښنه څرګنده کړې ده.
