''خدای ټرمپ د اسرائیلو د ژغورلو لپاره را لېږلی''
د عکس سرچینه، Getty Images
د امریکا بهرنیو چارو وزیر مایک پومپیو وايي، 'کېدای شي ' ولسمشر ډونلډ ټرمپ د خدای له لوري له ایرانه د یهودانو ژغورنې لپاره استول شوی وي.
اسراییلو ته د یوه مهم سفر لړ کې له 'کرسچن خپرندویه ادارې ' سره مرکه کې نوموړي وویل، دا د ده عقیده چې پر دې یې باوري کړی دی.
نوموړي دغه راز د امریکا د هغو هڅو ستاینه وکړه چې په وینا یې 'په منځني ختیځ کې دغه دیموکراسي، دغه یهودي دولت پر ځای پاتې دي '
دغه څرګندونې له ټولوژنې د یهودانو ژغورنې یوې ځانګړې ورځې په مناسبت مخې ته راغلې دي.
له ښاغلي پومپیو سره مرکه کوونکي یادونه وکړه، د 'پوریم ' په نامه دغه ورځ د ملکې استهیر لخوا له پارسیانو د یهودانو ژغورنې په مناسبت لمانځل کېږي.
په ځواب کې ښاغلی پومپیو چې د کنساس ایالت پخوانی سناتور او د سي ای ای مخکینی مشر و وايي:
''د یوه عیسوي په حیث زه په دې کلک باور لرم. ''
د عکس سرچینه، AFP/GETTY IMAGES
د خپلې واکمنۍ له لومړي سره ولسمشر ټرمپ د ایران پر ضد سخت دریځ غوره کړی دی. له دې مخکې د پنجشنبې پر ورځ ښاغلي ټرمپ د جولان غونډیو په تړاو د امریکا دریځ کې بدلون اعلان کړ.
ولسمشر ټرمپ په یوه ټویټر پیغام کې وویل، اوس وخت رارسېدلی چې امریکا پر جولان غونډیو د اسراییل بشپړ حاکمیت ومني.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
سوریې د امریکا ولسمشر ډونلډ ټرمپ هغه څرګندونې وغندلې او 'غیر مسوولانه ' یې وبللې چې وايي، اوس وخت راغلی چې د اشغال شویو جولان غونډیو د اسراییلو حاکمیت ومنل شي.
د سوریې دولتي خبري اژانس له لوري په یوه خبرپاڼه کې ویل شوي دا د اسراییلو لپاره د امریکا 'ړوند پلویتوب ' ښيي.
خبرپاڼه زیاتوي 'سوریه ژمنه ده چې له هرې ممکنې لارې دغه سیمه بېرته واخلي. '
جولان غونډۍ اسراییل په ۱۹۶۷ کې لاندې کړې او ۱۹۸۱ کې یې د خپلې خاورې برخه وبللې، چې نړیوالې ټولنې د اسراییل دغه اقدام په رسمیت نه دی پېژندلی.
اسراییل په سوریې کې د خپل دښمن ایران له پوځي حضور سره کلک مخالفت کوي، چې د سوریې اته کلنه جګړه کې ډېر شوی دی.
د پنجشنبې پر ورځ د ښاغلي ټرمپ څرګندونې د امریکا لسیزو پخوانۍ پالیسي په بله واړوله. په یوه ټویټر پیغام کې نوموړي وویل، دغه غونډۍ 'د اسراییل دولت او سیمې د ټیکاو لپاره ستراتيژیک او امنیتي اهمیت لري. '
د اسراییل لومړي وزیر بنیامن نتنیاهو د امریکا ولسمشر مننه کړې او هغه ته یې یوه ټیلیفوني اړیکه کې ویلي، تاسې تاریخي اقدام وکړ.
جولان غونډۍ څه دي؟
د عکس سرچینه، Reuters
جولان غوندۍ د سوریې له پلازمېنې دمشق نه ۶۰ کیلومتره سویل ختیځ کې پرته سیمه ده چې مساحه یې ۱۲۰۰ مربع کیلومترو ته رسېږي. منځني ختیځ کې د ۱۹۶۷ کال جګړې وروستیو کې اسراییل د جولان ډېره برخه له سوریې ونیوله او د ۱۹۷۳ کال جګړه کې د سوریې هغه هڅه ناکامه کړه چې د جولان بېرته نیولو لپاره یې پیل کړې وه.
یو کال وروسته دواړو هېوادونو هوکړه وکړه چې دغه سیمه کې به ۷۰ کیلومتره غیر پوځي زون رامنځته کوي، چې د ملګرو ملتونو یو څارونکی ځواک به پکې ګزمه کوي، خو په تکنیکي توګه دواړه هېوادونه د جګړې په حالت کې پاتې شول.
