کشمیر کې موټر بم برید ۴۰ هندي سرتېري وژلي
د عکس سرچینه، Getty Images
د هند تر ولکې لاندې کشمیر کې د سخت دریځو وسله والو یوه موټر بم برید کې د نیمه پوځي ملېشو لږ تر لږه ۴۰ هندي سرتېري وژل شوي دي.
ځايي پولیسو بي بي سي ته وویل، له باروتو ډک ګاډی د بسونو له هغه کاروان سره ټکر کړی، چې سرتېري یې سرینګر سیمې ته لېږدول.
پاکستان مېشتې جیش محمد نومې ډلې د دغه برید کولو ادعا کړې. ۱۹۸۹ کال د هند واکمنۍ خلاف کشمیر کې د وسله والو له فعالیتونو پیلېدو راهیسې دا تر ټولو خونړی برید بلل کېږي.
پاکستان او هند دواړه پر کشمیر دعوه لري، او هر یو یې پر نیمایي برخه کنترول لري.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د هند لومړي وزیر نرېندرا مودي دا یو 'بزدلانه ' برید بللی دی.
برید د سرینګر او جمو سیمو تر منځ د لویې لارې اوږدو کې شوی، چې کلکه څارنه یې کېږي. د بي بي سي اردو څانګې ریاض مسرور ته یوه ځايي پولیس افسر وویل:
''تر اوسه معلومه نه ده دغه کاروان کې څومره ګاډي وو، خو له باروتو ډک ګاډی تر نورو مخکې شو او له یوه بس سره وجنګېد، چې ۴۴ کسان پکې ناست وو. ''
چارواکي وايي، ښايي د وژل شویو کسانو شمېر نور ډېر شي، ځکه په وینا یې ډېر کسان سخت ژوبل شوي دي.
د اي ایف پي خبري اژانس په رپوټ کې ویل شوی، جېش محمد ځايي رسنیو ته په یوه لېږل شوې اعلامیه کې ویلي، دغه برید د دوی یوه ځانمرګي کس کړی دی.
غبرګونونه
د عکس سرچینه، Reuters
د هند لومړي وزیر دغه برید سخت غندلی دی. د کورنیو چارو وزیر رجنات سینګ وايي ''جېش محمد پاکستان مېشتې ډله ده چې د پاکستان ملاتړ ورسره دی. ''
بل لور ته د هند اقتصاد وزیر ارون جیټلي وايي، هغو کسانو ته به چې ''دغه فجیع عمل یې کړی، نه هېرېدونکی درس ورکړل شي. ''
د کشمیر دوو پخوانیو لومړي وزیرانو عمر عبدالله او محبوبه شیخ هم پر ټویټر پاڼه د برید په تړاو پیغامونه لیکلي.
د عکس سرچینه، Reuters
چارو شنونکي وايي، له دې وروستي برید سره به د دواړو ګاونډیو هېوادونو تر منځ تاو تریخوالی ډېر شي. له ۱۹۸۹ راهیسې کشمیر کې ۱۰ ځانمرګي بریدونه شوي، خو موټر بم برید پکې کمساری دی.
