تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د لندن ښار په زړه کې "ترهګریز" برید شوی
د لندن په زړه کې د برتانیې د پارلمان ودانۍ ته نژدې موټري برید شوی چې درې تنه پکې ټپیان شوي دي.
د موټر چلوونکی د ترهګریز برید په تور نیول شوی دی.
د پولیسو په وینا، د لندن پر وخت د سهار پر ۷ نیمو بجو په وېسټ مېنسټر سیمه کې یو کس خپل موټر پر بایسکل سپرو او پلو کسانو ور وخېژاوه.
ویل کېږي چې د بریدګر عمر د ۲۰ کالو په شاوخوا کې دی او تر دې دمه یې پولیسو ته هېڅ مالومات نه دي ورکړي.
د سکاټلنډ یارډ د پولیسو مشر نیل باسو ویلي، دا چې برید قصدي دی او په یوه سمبولیکه سیمه کې شوی، دوی په دې باور دي چې دا یو ترهګریز عمل و.
د نوموړي په وینا، دا مهال د لندن ښار په کومه بله سیمه کې د احتمالي برید په اړه کوم د پام وړ استخباراتي مالومات نشته.
په ژوبلو کسانو کې د یوې ښځې ټپونه ژور دي، خو ویل کېږي چې ژوند ته یې خطر نشته.
د بریدګر په موټر کې کومه وسله نه ده موندل شوې، او نه هم کوم بل کس ورسره موټر کې ناست و.
د بریدګر نوم تر اوسه نه دی ښودل شوی، خو داسې رپوټونه دي چې نوموړی د برمنګم ښار اوسېدونکی دی.
د برید سیمه د عامو خلکو د تګ راتګ پر مخ تړل شوې او د بسونو او اورګاډو تمځایونه هم بند دي.
د پېښې یو عیني شاهد بري ویلیمز بي بي سي ته وویل:
"یو موټر مې ولید چې په چټکۍ سره د پارلمان ودانۍ خوا ته روان دی. ناڅاپه چیغې شوې. موټر غلط لاس ته واوښت او پر هغو بایسکل والو ور وخوت چې د ترافیک اشارې ته ولاړ وو. بیا موټر په شا روان شو او له دېوال سره ټکر شو. څو شېبې وروسته پولیس را ورسېدل".
د برتانیا د ترانسپورت پولیسو ویلي چې په انګلستان، سکاټلنډ او وېلز کې خپلې ګزمې ډېروي.
