جرمني د افغان کډوالو بېرته ستنولو لړۍ بيا پيل کړه

د جرمني کورنيو چارو وزارت وايي اته افغان کډوال يې بېرته افغانستان ته ستانه کړي. پلازمېنه کابل کې د مې پر ٣١ نېټې له شوي ټانکر بمب بريد وروسته دا د افغان کډوالو لومړنۍ جوپه ده چې له جرمني افغانستان ته استول شوې.

رويټرز خبري آژانس د جرمني د کورنيو چارو وزير "توماس ديميزير" په وينا ليکلي دغه اته سره افغانانو جرمي دوسيې درلودلې او د پناه غوښتنې قضيې يې هم رد شوې وې.

را رسېدلي رپوټونه وايي د جرمني څو ايالاتونو افغانستان ته د افغان پناه غوښتونکو بېرته ستنولو لپاره چمتووالى نيولى. جرمن چارواکو ويلي دا د بېرته ستنولو هماغه پخوانى لړۍ ده چې په کابل کې د بريد او د جرمن سفارت ودانۍ ته د زيان اوښتو له امله ځنډول شوې وه.

جرمني له تېر ډسمبر راهيسې د افغان کډوالو بېرته ستنولو چاره پيل کړې او وايي يوازې هغه افغانان به بېرته خپل هېواد ته ستانه کړل شي چې جرمونو کې ښکېل وي او يا د پناه غوښتنې قضيې يې له ټولو قضايي پړاوونو تېرېدو وروسته رد شي.

جرمني تېر کال د ۸۰ زره کسانو د پناه غوښتنه رد کړه او هغوی یې بېرته خپلو هېوادونو ته واستول او د جرمني چارواکو ویلي چې دا شمېره به په ۲۰۱۷ کال کې تر دې هم لوړه وي. د راپورونو له مخې په پام کې ده چې شاوخوا ۱۱۹۰۰ کډوال بېرته افغانستان ته واستوي.

سږ کال له جرمني ۵۵ زره کډوال پخپله خوښه وتلي

جرمني کې افغان کډوال ماشوم له انګلا مېرکل مننه وکړه

-جرمني ته ورتلونکي کډوال بايد جرمني ژبه زده کړي-

داسې انګېرل کېږي چې د جرمني لومړۍ وزیره انګلا میرکل غواړي په دې توګه د هغو محافظه کارو رایه ورکوونکي ملاتړ خپل کړي چې د کډوالو پروړاندې د هغې د پرانيستو دروازو له سیاست نه خوښ نه دي.

ملګرو ملتونو نژدې دوې اونۍ وړاندې په خپل راپور کې وویل چې په ۲۰۱۶ کال کې افغانستان کې د ملکي وګړو مرګ ژوبله ډېره شوې او ۱۱۵۰۰ کسانو ته رسېدلې چې یو پر درېیمه برخه یې ماشومان دي.

د بخښنې نړیوال سازمان هم پر دې پرېکړې اعتراض کړی او هغه "بشري حقونو ته د درناوي" خلاف بللی او ویلي یې دي "افغانستان کې په بېلابېلو وختونو کې په مختلفو ځایونو کې په مختلفونو درجو وضعیت خرابېږي"

خو د جرمني د کورنیو چارو وزیر ویلي د افغانستان شمال او کابل دومره امن دي چې د کډوالو بېرته ستنول به "د منلو وړ" کار وبلل شي.

د جرمني حکومت د نورو کډوالو پرتله د افغان کډوالو د بېرته ستنولو په برخه کې له ډېرو نیوکو سره مخ شوی، په ځانګړې توګه چې په تېر اکتوبر کې د افغانستان او اروپا ترمنځ د کډوالو د بېرته ستنولو په برخه کې یو هوکړه لیک لاسلیک شو

تېر م کال ٣٣٠٠ افغان کډوال په خپله خوښه له جرمني بېرته افغانستان ته ستانه شول او ٦٧ نور په زوره شړل شوي.

خو سږکال بيا افغانستان ته د ستانه کړل شويو کډوالو شمېر وار له مخه له١٠٠ تنو اوښتى.