تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
سرگې لاوروف: د امريکا نوې افغان تگلاره "ناکاره" ده
د روسيې بهرنيو چارو وزير سرگې لاوروف افغانستان لپاره د امريکا نوې تگلاره "خواشينونکې او ناکاره" بللې ده.
ښاغلي لاوروف په مسکو کې يوې خبرې ناستې ته وويل "خواشينى يم چې د واشنگټن له لوري نوې اعلان شوې تگلاره د زور پر کارونې ورټوله ده."
ښاغلي لاوروف زياته کړه دا کړنلاره گټه نلري.
د امريکا بهرنيو چارو وزير رېکس تېلرسن تېره سه شنبه پر روسيې تور پورې کړى و چې طالبانو ته وسلې ورکوي. ښاغلي تېلرسن وويل د روسيې دا کړنه له نړيوالو قوانينو سره په ټکر کې ده.
خو ښاغلي لاوروف په خپلو څرگندونو کې طالبانو ته د وسلو ورکړې تورونه رد کړل او وې ويل "دا لومړى ځل نه دى چې پر موږ طالبانو ته د وسلې ورکولو تور پورې کېږي خو لا هم يو ثبوت نه دى وړاندې شوى."
بل لوري ته د پاکستان بهرنيو چارو وزير خواجه آصف وايي امريکا ته يې خپل پلان کړى سفر ځنډولى دى.
د امريکا متحدو ايالتونو ته د دغه پاکستاني وزير سفر ځنډېدا اعلان دوه ورځې وروسته له هغه مخې ته راځي، چې د امريکا ولسمشر ډونلډ ټرمپ د افغانستان په تړاو خپلې نوې تگلارې کې پرپاکستان نيوکې وکړې او وې ويل چې ترهگرو ته پټنځي برابروي.
خو پاکستان دا تورونه رد کړي او وايي د خبرو اترو له لارې د افغان شخړې اوارولو لپاره يې له امريکا او افغانستان سره کار کړى.
