لومړنۍ سناتوره چې پارلمان کې یې لور ته شیدې ور کړې

اسټرالیايۍ لاریسا واټرز لومړنۍ سیاستواله ده چې په پارلمان کې یې خپل تیخور ماشوم ته خپلې شیدې ور کړې.

د چپي یا زرغون ګوند مشرې لاریسا واټرز د سې شنبې په ورځ په مشرانو جرګه کې د غونډې پر مهال خپلې دوه میاشتنۍ لور ته تی ور کړ.

د اسټرالیا ولسي جرګې هم تېر کال ماشوم ته د تي ور کولو اجازه وکړه، خو تر اوسه کومې وکیلې یا سناتورې ماشوم ته تی نه و ور کړی.

* تی ورکول میندې له شکر ناروغۍ ژغوري

* 'د میندوارې ښځې خوراک ماشوم د زړه له ناروغۍ ژغورلی شي'

لاریسا واټرز په فیسبوک کې ویلی: "په پارلمان کې نورو میندو او پلرونو ته اړتیا ده، موږ ته د کار کولو داسې ځای پکار دی، چې ډېر کورنۍ پال او د ماشومانو ساتونکی او منونکی وي".

د کارګر ګوند سناتورې کیټي ګیلیګر د اسټرالیا له سکای نیوز سره په مرکه کې ویلي: "مېرمنې بچي زېږوي، که کار کوي، نو د کار پر مهال د بجیو پالل هم غواړي، دا حقیقت دی چې موږ باید اجازه ور کړو".

تېر کال د اسټرالیا ولسي جرګې خپلو غړو ته اجازه وکړه، چې د پارلمان یا پبلېک ګالري ته کوچنیان راوړلی او تی ور کولی شي، خو مشرانو جرګې پر ۲۰۰۳ کال ماشومانو ته د تي ور کولو اجازه کړې وه.

تېر کال د برتانیا سیاستوالو غوښتنه کړې وه چې په پارلمان کې دې د تي ور کولو په اجازه غور وشي.

د نړۍ په پارلمانونو کې ماشومانو ته تی ور کول نازکه مسله ده.

پر ۲۰۱۶ کال د اسپانیا د پارلمان غړې کیرولینا بیسکانسا جرګې ته د خپل بجي د راړلو او تي ور کولو له ا مله له سختو نیوکو سره مخ شوه.