د استانبول برید مشکوک 'افغانستان کې روزل شوی'

د ترکیې استانبول والي وايي، د نوي کال پر شپه پر کلب مشکوک بریدګر عبدالقادر ماشاریپف په افغانستان کې روزل شوی و او په برید کې یې خپل لاس لرل منلي دي.

د استانبول والي واسپ شاهین ویلي، اټکل کېږي چې مشکوک یو کال وړاندې د ۲۰۱۶ کال جنورۍ کې ترکیې ته تللی وي.

'اسلامي دولت' ډلې د استانبول پر شپې کلب د برید پړه منلې

"استانبول کي پر کلب شکمن بريدګر نيول شوی"

ده وویل، مشکوک نیول شوي د برید په ترسره کولو اعتراف کړی او د ګوتې نښې یې د برید په ځای کې د څېړل شویو ګوتنښو سره یوشان دي.

په رینا کلب برید کې نهه دېرش کسان ووژل شول او لسګونه نور ټپیان شول.

په وژل شوو کې د اسرائیلو، فرانسې، تونس، لبنان، هند، بلجیم اردن او سعودي عربستان وګړي هم وو.

د برید پړه د (اسلامي دولت) داعش په نامه ډلې ومنله، چې په وینا یې دا برید یې په سوریه کې د ترکیې د پوځي مداخلې په غچ اخیستو کې کړی.

پولیسو د دوشنبې پر ماښام استانبول کې د یوه قرغیزستاني په کور کې مشکوک ونیو. ترکي رسنیو وویل، د مشکوک ملګری او درې نورې ښځې هم نیول شوې.

ښاغلي شاهین وویل، ځینې ناسم رپوټونه خپاره شوي چې له مشکوک سره د هغه څلور کلن زوی هم د نیول کېدا پرمهال و.

دی زیاتوي، پولیسو په کور کې تومانچې، چاودېدون:ي توکي او بهرنۍ پیسې هم موندلې دي.

عبدالقادر ماشاریپف څوک دی؟

ترکیه کې د داعش بریدونه