ملي عوامي ګوند وايي 'پاکستان د ترهګرو ملاتړ کوي'

د پښتونخوا ملي عوامي ګوند ویلي، چې د پاکستان مرکزي حکومت د سخت دريځو او مذهبي تندلارو ملاتړ کوي.

دوی ویلي همدا لامل دی چې هېواد ناامنه شوی، او ان ګاونډی افغانستان هم ټیکاو ته نه پرېږدي.

دغه ګوند په ګوټه کې د هزاره ګانو او کراچۍ کې د بښتنو د وژنې پرضد دا څرګندونې د کوټې په یوه احتجاجي غونډه کې کړې دي.

د ملي عوامي ګوند په ملاتړ راټولو شوو لاریون کوونکو د کوټې ښار پاچاخان څلورلارې ته څېرمه غونډه وکړه.

په دې غونډه کې د هزاره ګانو ګڼو استازو هم ګډون کړی و.

دې غونډې ته ویناوالو ایالتي حکومت د صوبې د امنیت په خوندي کولو کې پاتې وباله.

دوی ویل، چې کراچۍ کې د پښتنو د وژنې تر شا د پاکستان د مرکزي حکومت لاس دی.

د غونډې یوه ویناوال، د پښتونخوا ملي عوامي ګوند ایالتي سرمنشي عبدالرحیم زیارتوال وویل، چې لاهم افغانستان کې د پاکستان له خوا لاسوهنه روانه ده.