بلوچستان کې د جماعت اسلامي پر مشر سراج الحق ځانمرګی بريد؛ ۷ تنه ټپيان شوي
د عکس سرچینه، Getty Images
د بلوچستان په ږوب سیمه کې د پاکستان جماعت اسلامي د مشر سراج الحق د موټرو پر کاروان بريد شوی دی.
د جماعت اسلامي لخوا خپاره شوي بيان له مخې بريد هغه مهال شوی چې سراج الحق ږوب ته د يوې جلسې لپاره روان و.
پر ټوېټر پاڼه جماعت اسلامي دا "ځانمرګی بريد" بللی چې په وينا یې سراج الحق ته په کې زيان نه دی اوښتی.
د ږوب د پوليسو يوه مشر سعید احمد عمراني هم د ځانمرګي برید پخلی کړی او بي بي سي ته یې ویلي چې سراج الحق له چاودنې خوندي وتلی.
جماعت اسلامي وايي، "ځانمرګی بريدګر" وژل شوی او د دوی ۷ کارکوونکي ټپيان شوي، چې د څلورو روغتيايي حالت نازک دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
جماعت اسلامي ګوند د بريد يوه ويډيو هم خپره کړې چې په کې خلک د موټرو کاروان شاوخوا راټول دي، خو يو ناڅاپه لوګي پورته شي او خلک شاوخوا منډې پيل کړي.
په ويډيو کې د یوه سړي جسد هم ښودل شوی چې جماعت اسلامي یې "ځانمرګی بریدګر" بولي. خو تر اوسه پوليسو په دې اړه څه نه دي ويلي.
د پاکستان په بېلابېلو سيمو کې په دې وروستيو کې بريدونه زیات شوي دي.
د خیبر پښتونخوا له ټانک سیمې رپوټونه وايي چې هلته پر پولیسو دوه جلا بریدونه شوي. د مالوماتو له مخې، لږ تر لږه د دوو پولیسو په ګډون ۲۲ کسان په دغو بریدونو کې ژوبل شوي دي.
بل پلو د بلوچستان د مستونګ سيمې ځايي مسولان وايي چې هلته د پولیو واکسيناتورانو پر ډلې برید شوی.
