شمالي وزيرستان کې وسله والو څلور ځوانان په ډزو وژلي دي
د عکس سرچینه، Getty Images
د خيبر پښتونخوا شمالي وزیرستان کې ناڅرګندو وسله والو څلور کسان چې د وزیرستان د ځوانانو د ټولنې غړي دي، په ډزو وژلي دي.
دوو موټر سایکل سپرو ځايي وخت ماسپښين مهال د حيدر خېلو سيمې پر ځوانانو ډزې کړې او تښتېدلي دي.
اسلام اباد کې خبريال طاهر خان د شمالي وزيرستان د چارواکو له خولې وايي دغه څلور وژل شوي ځوانان له چکر وروسته ګاډي کې کورونو ته روان وو چې موټر سايکل سپرو وسله والو پرې ډزې وکړې.
تر اوسه د برید مسولیت چا نه دی منلی. پوليس وايي د پېښې په اړه يې پلټنې پيل کړې دي خو تراوسه په دې تړاو څوک نه دي نيول شوي.
د پاکستان په قامي اسمبلۍ کې د شمالي وزيرستان استازي او د ملي جمهوري غورځنګ ګوند مشر محسن دوړ دغه پېښه غندلې او پر ټوېټر پاڼه يې ليکلي چې په دې پېښه کې د ده د ګوند يو غړی هم وژل شوی دی.
نوموړي د پښتونخوا، بلوچستان، سند او پنجاب په مختلفو ښارونو کې د دې هدفي او وروستيو وژنو په ضد د احتجاجونو اعلان کړی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د یادولو ده چې په دې وروستیو کې په خیبرپښتونخوا کې دا ډول غلچکي بریدونه ډېر شوي ښکاري. څه موده مخکې پېښور کې دوه سکان، یو عیسوی راهب، په هنګو کې د ترافیکو دوه پولیس، په ډېره اسماعیل خان کې درې شیعه ګان او په کوهاټ او بنو کې هم د پولیسو چارواکي ووژل شول.
په وروستیو کې په شمالي وزيرستان کې هدفي وژنې زياتې شوې چې په اړه يې ځايي خلکو احتجاجونه هم کړې دي.
وړاندې د پاکستان د کورنيو چارو وزير شيخ رشيد احمد له بي بي سي سره خبرو کې ويلي وو چې د پاکستان په بېلابېلو برخو په تېره بيا بلوچستان او خيبر پښتونخوا سيمو کې ترهګرې ډلې يو ځل بيا فعالې شوې دي.
