پاکستان: تورخم به سرله سبا شپه او ورځ په آزمویښتي ډول خلاص وي
د عکس سرچینه، Getty Images
پاکستان وايي سر له نن (دوشنبه د وږي ۱۱) به د افغانستان لپاره د تورخم لار په ازمايښتي ډول شپه او ورځ خلاصه پرېږدي او خلک به پرې تګ راتګ کولی شي، خو ویزې ته به بیا هم اړتیا وي.
د خیبرپښتونخوا ایالت چارواکي وايي، لومړی وزیر عمران خان به یوه اوونۍ وروسته د دې لارې د ۲۴ ساعته خلاصېدو پرانست غونډه وکړي، خو دوی دغه لاره سر له سبا چې د سپټمبر دویمه کېږي ۲۴ ساعته پرانستې پرېږدي.
د خیبرپښتونخوا د اطلاعاتو وزیر شوکت یوسفزي له بي بي سي سره په خبرو کې وویل، د پاکستان لومړی وزیر عمران خان دوی ته ویلي چې تر ورتګ وړاندې یې دا لاره خلاصه کړي چې معلوم شي څه کمۍ شته چې پر آوارولو یې کار وشي.
ښاغلي یوسفزي وویل چې د افغانستان او پاکستان ترمنځ سوداګري شته نو باید هم تجارت او هم د عامو خلکو لپاره آسانتیا رامنځته شي.
د ښاغلي یوسفزي په خبره تراوسه د پرانیست غونډې د نېټې اعلان نه دی شوی، چې د پاکستان لومړی وزیر به کله ورځي، خو تر هغه پورې به دروازه ۲۴ساعته خلاصه وي.
د پاکستان او افغانستان ترمنځ تورخم لاره چې تر ټولو لارو زیات تګ راتګ پرې کېږي، تراوسه به یوازې د ورځې په مخ خلاصه وه، خو پاکستان ته د افغان ولسمشر اشرف غني په وروستي سفر کې پاکستان د تورخم لارې د څلرویشت ساعته خلاصېدو اعلان کړی و.
