کوټه: پر تشو ګونیو یا بوجیو د محصلینو ښایسته انځورګري

تشې بورۍ، بوجۍ یا ګونۍ تر ډېره نه ساتل کېږي، بلکې معمولاً له استعمال وروسته ډېرانونو ته رسېږي، خو د بلوچستان پوهنتون په یوه نندارتون کې دغه ډول ګونۍ په یوه بله بڼه ولیدل شوې.

دغه نندارتون کې ثابته شوه، چې که پر استعمال شوې ګونۍ انځورګري وشي، نه یوازې دا چې ښایسته ښکاري، بلکې د یوې ښایسته او زینتي تابلو په توګه په کورونو، رستورانونو، دفترونو او دکانونو کې هم ټومبل کېدای شي.

د بلوچستان پوهنتون ښکلو هنرونو څانګې له درې ورځني روزنیز ورکشاپ وروسته دغه انځورونه نندارې ته وړاندې کړي دي.

مشهور انځورګر موسی عمر د دغه روزنیز ورکشاپ لپاره له عمانه رابلل شوی و.

نوموړي محصلینو ته وښوده چې هغه څېزونه هم د ګټې وړ کېدای شي، چې معمولاً موږ فکر کوو بې ګټې دي او ډېرانونو ته یې غورځوو.

د دغه درې ورځني ورکشاپ بهیر کې پر تشو ګونیو بېلا بېل انځورونه وکښل شول.

موسی عمر وايي، 'ګونۍ داسې څه دي چې خلک ډېر اهمیت نه ورکوي او ډېرانونو ته یې غورځوي، خو که لږ زحمت ورسره وشي، ښایسته هنري تابلو ترې جوړېږي. '

د موسی عمر په خبره 'د پوهنتون محصلینو په درې ورځې کې ښایسته انځورګري زده کړه. '

د پوهنتون یوه محصل نجیب بلوڅ وايي، مشهور هنرمند دوی ته د دې هنر ورزده کولو سره دوی ته ډالۍ ورکړې. '

نوموړی وايي، مخکې نورو سیمو کې داسې انځورګري کېده، خو بلوچستان کې لومړی ځل داسې انځورګري کېږي. ښاغلی بلوڅ وايي، په خپله انځورګرۍ کې یې د د مهر ګړ لرغوني مدنیت ته پام کړی دی.

محصلین وايي، د ګوادر بندر په ګډون یې بېلا بېل موضوعات په خپلو انځورونو کې راخیستي دی.

۔