"د وزيرستان واڼه کې طالبانو څلور تنه وژلي او له ۴۰ زيات ټپيان کړي"
د عکس سرچینه، Getty Images
د پښتون ژغورنې غورځنګ يوه مشر محسن داوړ له بي بي سي پښتو سره خبرو کې وويل، د جنوبي وزيرستان د واڼه په کړي کوټ کې د طالبانو په ډزو کې لږ ترلږه څلور ولسي وګړي وژل شوي او له ۴۰ زيات ټپيان دي.
د نوموړي په وينا بريدګر تر ډزو وروسته له سيمې تښتېدلی دی.
محسن داوړ وايي د دې پېښې په غبرګون کې پېښور کې يو شمېر خلکو احتجاج کړی او سړکونو ته راوتلي دي.
د جنوبي وزیرستان ځايي چارواکو هم د دې پېښې پخلی کړی او وايي د طالبانو او ځايي وګړیو تر منځ نښته کې لږ تر لږ لس تنه ټپيان شوي، چې په کې د ځينو حالت د اندېښنې وړ دی.
د ځايي حکومتي سرچینو په خبره طالبانو د پښتون ژغورنې غورځنګ د یوه مخکښ علي وزیر د تېلو پر پمپ برید کړی دی.
په واڼه کې پولیټيکل انتظاميې ځينو سرچینو بي بي سي ته ویلي، پرون شنبه ځينو وسله والو طالبانو هلته د ځينو ځوانانو له سرونو د پښتین خولۍ غورځولې وې او اور يې ورته کړی و، د سرچینو په خبره دې طالبانو اخطار هم ورکړی و، چې نه به د پښتین ملګري کوي او نه به يې هم خولۍ پر سر کوي.
د سرچینو په خبره نن ماسپښین د واڼه په کړي کوټ سیمه کې د تېلو پر یوه پمپ د منظور د پلویانو او وسله والو ترمنځ تودې خبرې شوې، چې وروسته ورباندې د وسله والو له لوري ډزي شوې دي. د تېلو دغه پمپ د پښتون ژغورنې غورځنګ د یوه مخکښ علي وزیر دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د پښتون ژغورنې غورځنګ مشر منظور پښتين د دغه برید غندنه کړې او پر خپله ټيوټر پاڼه يې لیکي، چې دغه برید د "ښو طالبانو" له لوري شوی، چې د ده په خبره د "پاکستان د پوځ او استخباراتو ملاتړ" ورسره دی.
د سیمې د ځايي وګړیو په خبره په واڼه او شاوخوا سیمو کې له کلونو راهیسې ځينې وسله وال فعال دي، چې د دوی په خبره په سیمه کې يې ولس "ښه طالبان" بولي او دغه طالبان چې د دوی په خبره د پاکستان له استخباراتو سره يې روغه کړې، په ښکاره وسلې ګرځوي.
دغه وسله وال چې د قومندان عین الله په مشرۍ کې فعاله دي، د ځايي وګړیو په خبره له څو اونیو راهیسې يې په واڼه او شاوخوا سیمو کې د پښتون ژغورنې غورځنګ ضد فعالیت پېل کړی او ځايي وګړيو ته له غورځنګه لېرې اوسېدو امرونه کوي.
بي بي سي د واڼه له پوليټيکل ایجنټ سهېل خان او د هغه مرسیتال کامران خان خټک ته د پېښې په تړاو بیا بیا زنګونه ووهل، خو اړيکه ورسره ټينګه نه شوه.
په واڼه کې د پولیټيکل انتظاميې سرچینو په خبره دواړه په سیمه کې نشته.
