هدايت الله هميم بي بي سي پښتو ټکى کام

	مشرف ته تېره ورځ يوه وخت ورکړل شوى و، چې له خپلې دندې لاس په سر شي .

ښاغلي مشرف وويل دغه پرېکړه يې له خپلو حقوقي سلاکارانو او نژدې سياسي ملاتړو سره له سلا مشورې وروسته د پاکستان د خلکو په خاطر کړې ده .

ده د خپلو مفصلو تلويزيوني وينا په پاى کې وويل : '' د خلکو د گټو په خاطر، زه نن له خپلې دندې استعفا ورکوم او خپله راتلونکې د پاکستان خلکو ته سپارم، پرېږدئ چې زما په اړه خلک قضاوت وکړي .''

پروېز مشرف چې پوره نهه کاله وړاندې په پوځي جامو کې د پاکستان د ولسمشرۍ په څوکۍ کښېناست، نن دوشنبه (د اگست ١٨) له يوې احساساتي وينا وروسته د پاکستان خلکو ته داسې وويل : '' د خداى پامان پاکستان، پاکستان دې ژوندى و او خداى دې پاکستان وساتي .''

ښاغلى مشرف د پاکستان په تاريخ کې لومړنى ولسمشر دى، چې له خپلې دندې استعفا ورکوي .

د خداى پامان  د خپل ملت په خاطر له خپلې دندې استعفا ورکوم او خپله راتلونکې د پاکستان خلکو ته سپارم، پرېږدئ چې خلک زما په اړه قضاوت وکړي ... خداى پامان پاکستانه، پاکستان دې ژوندى وي او الله دې پاکستان وساتي

د ښاغلي مشرف د استعفا له اعلانېدو سره سم د کراچۍ د اسعارو په بازارونو کې په سلو کې څلور لوړوالى راغى .

رپوټونه وايي د مشرف د استعفا سره سم د پاکستان په يو شمېر ښارونو کې خلک واټونه ته راووتل او د خوښۍ نڅاگانې يې کولې .

'' خلکو ته ٤٤ کاله خدمت '

د پاکستان گوښه شوي ولسمشر د خپلې تلويزيوني وينا په ترڅ کې وويل ده هڅه وکړه چې د پاکستان د واکمن ايتلاف له لوري پر ده له لگول شويو تورونو نه دفاع وکړي .

ده وويل چې ٤٤ کاله يې خپل هېواد او خلکو ته خدمت وکړ، چې په وينا يې هر کال کړى، د خپلو خلکو او پاکستان لپاره يې کړى دى .

	د مشرف په گوښه کېدو ځينو خلکو خوښۍ وکړې

ده د خپلو خبر و پرمهال خپل مخالفين تورن کړل چې د پاکستان د ملت او گټو په خلاف خبرې کوي .

ښاغلي مشرف وويل: '' زه له خپلو هغو 'سياسي او غير سياسي ملگرو' مننه کوم، چې له ماسره يې په ستونزمنو وختونو کې مرسته کړې ده .''

ده د خپلې تېرې نهه کلنې واکمنۍ پرمهال په بېلابېلو برخو کې له خپلو کړنو دفاع ورکړه .

پروېزمشرف د خپلو خبرو په ترڅ کې د هېواد اقتصاد، د پانگونې ډېروالي او د بهرنيو اسعارو پر وړاندې د ملي مروجې پيسې د اروزښت زياتونې ته اشاره وکړه .

همدارنگه د پاکستان ولسمشر د هېواد په بېلابېلو برخو کې د مخابرواتو پرمختگ ته هم اشاره وکړه .

	په ايالتي شوراگانو کې د باور وروستۍ رايې ښيي چې د ولسمشر ملاتړ له منځه تلونکى دى

د پاکستان واکمن گوند تېره ورځ له ښاغلي مشرف نه غوښتي وو، چې د اگست تر ١٨ پورې له خپلې دندې استعفا ورکړي، که نه نو استيضاح ته به راوغوښتل شي .

دغه ايتلاف، چې مشري يې د پاکستان د پخواني لومړۍ وژل شوې وزيرې بېنظير بوټو د گوند په غاړه ده، ښاغلى مشرف يې په بې کفايتۍ او له اساسي قانون نه د سرغړاوي په تور تورناوۀ .

د پاکستان د بهرنيو چارو وزير شاه محمود قريشي او د واکمن گوند غړو تر دې وړاندې ويلي وه ښاغلى مشرف ډېر وخت نه لري .

د مسلم ليگ – نواز شريف د گوند يوه چارواکي ويلي : '' پر مشرف ډېر لوى تورونه وجود لري .. . موږ به دغه تورونه لږترلږه تر سې شنبې ورځې پورې اړوندو چارواکو ته وسپارو .''

خو د پاکستان د ولسمشر وياند ويلي وه، چې ښاغلى مشرف به استعفا ور نه کړي او له خپل ځانه به دفاع وکړي .

ښاغلى مشرف په ١٩٩٩ کال کې د دولت پروړاندې، د نوازشريف په خلاف د يوې کودتا په ترڅ کې واک ته ورسېد .