کبير حقمل له کابله

	ويل شوي چې تښتول شوي ښوونکي او چپړاسي د غزني ښار په مرکز پورې د ارزو په نامۀ ښوونځي سره تړاو لري

دغه کسان د غزني په مرکز پورې تړلي له اروزو نومي ښوونځي څخه تښتول شوي دي.

ځايي رسنيو د وسله والو طالبانو له خولې ويلي چې دغه تښتونې دوى کړې، خو دا يې نه دي ويلي چې د تښتونې علت يې څه و .

په ښوونکو او ښوونځيو د بريدونو او ياهم د هغوى د تښتونو دا تر ټولو نوې پېښه پرون په غزني ولايت کې وشوه چې د يوه ښوونځي دوه ښوونکي او يو چپړاسي پکې د وسله والو طالبانو لخوا وتښتول شول.

د ښوونې و روزنې کارپوهان وېره ښيي چې که دغه حالت بدل نشي په ځانگړې توگه به د افغانستان په جنوبي سيمو کې ډېر ماشومان نالوستي پاتې شي .

د دغه ولايت چارواکو له ځايي رسنيو سره په خبرو کې ويلي چې وسله والو طالبانو ښوونځي ته په ننوتو دغه کسان له ځانه سره بېولي.

يوۀ طالب وياند هم دا خبره منلې خو دا يې نه دي ويلي چې ولې يې ښوونکي تښتولي دي . په تېرو کلونو کې وسله والو حکومت مخالفو کسانو څو ځلي ښوونکي ، ښوونځي او له ښوونې و روزنې سره تړلې ادارې په نخښه کړي دي .

همدا تېره اوونۍ د لوگر په ولايت کې يو ښوونځى د وسله والو کسانو له پرله پسې گواښونو وروسته وتړل شو .

د ښوونې و روزنې افغان وزير حنيف اتمر په دې وروستيو کې په ډاگه کړه چې تېر کال په بېلابېلو پېښو کې د افغانستان په لسگونو ښوونځي سوځول شوي او د پوهنې ١٥٢کار کوونکي او ښوونکي د وسله والو طالبانو لخوا وژل شوي دي.

دغه راز تېر کال د ٦٠٠ ښوونځيو د تړلو خبره هم چارواکو تاييد کړې ده . د نا امنيو له امله تېر کال درې سوه زره زده کوونکي ښوونځيو ته نه و تللي .

چارواکي له ولس څخه مرسته غواړي چې د دغه ډول بريدونو په مخنيوي کې مرسته وکړي . خو خلک بيا وايي چې له وسله والو سره د ټوپک په ژبه د خبرو وس نه لري .

د ښوونې و روزنې کارپوهان وېره ښيي چې که دغه حالت بدل نه شي په ځانگړې توگه به د افغانستان په جنوبي سيمو کې ډېر ماشومان نالوستي پاتې شي .