په کابل کې د اطلاعات و کلتور له وزارت څخه يوه خبرپاڼه وايي دا پرېکړه د اسلامي هېوادونو د کلتور د وزيرانو په شپږمه غونډه کې وشوه چې د ليبيا په پلازمېنه طرابلس کې جوړه شوې ده.

د خبرپاڼې له قوله، د افغانستان د اطلاعات و کلتور وزير کريم خرم چې په دغې غونډه کې يې گډون کړى دا پرېکړه نه يوازې د افغانانو، بلکې د ټولې اسلامي نړۍ لپاره يو وياړ بللې.

د شاوخوا ٥٧ اسلامي هېوادونو د کلتور وزيران په طرابلس کې د آيسيسکو لخوا سره غونډ شوي چې د راتلونکي کلونو لپاره د اسلامي نړۍ پر کلتوري اړيکو او پلانونو خبرې وکړي.

غزنى د اسلامي تاريخ او د منځنۍ او سويلي اسيا د تېر هغه برخه ده چې تر ټولو زيات يې د لسمې ميلادي پېړۍ په پاى او د يوولسمې پېړۍ کې نوم ايستلى. د محمود غزنوي د سلطنت په پېر کې غزنى د غزنوي امپراتورۍ مرکز و. د دغې امپراتورۍ لمنې د هند له نوي ډيلي، د ايران تر سويله او د منځنۍ اسيا تر پخوانۍ بخارا پورې غوړېدلې وې.

تر اوسه معلومه نه ده چې د اسلامي نړۍ د تمدن پلازمېنه به يو سمبوليک نوم وي چې غزني ته ورکول کېږي، که به څۀ عملي کارونه هم ورسره ملۀ وي.