په جنوري کې هم په موصل کې پنځه امريکايي سرتېري وژل شوي وو

د فرانسې خبري اژانس د امريکا د پوځي چارواکو له خولې خبر ورکړى چې څلور سرتېري په بغداد کې د گزمې پر مهال د هغوى پر موټر د چاودنې له امله وژل شوي دي.

خبر زياتوي چې بل سرتېري د عراق په شمال کې خپل ژوند له لاسه ورکړى.

د جمعې په ورځ هم په شمالي ولايت التميم کې د سړک غاړې د بم په چاودنه کې يو امريکايي سرتېرى وژل شوى وو.

تېر کال په بغداد کې د امريکايي پوځ له خوا د پراخو عملياتو تر سره کولو وروسته په پوځ باندې بريدونه را کم شوي وو خو په دې وروستيو اوونيوکې دا بريدونه بيا ډېر شوي دي.

د امريکا د پوځ يو قوماندان ويلي د نوي ميلادي کال له پيل وروسته په اوسط ډول هره ورځ په امريکايي سرتېرو يو بريد کيږي چې پرمختللي بمونه پکې کارول کيږي.

د جنوري په وروستۍ اوونۍ کې هم په موصل کې د سړک غاړې د بم په يوې چاودنه کې پنځه امريکايي سرتېري وژل شوي وو.