يوۀ حکومتي چارواکي وويل يو سړى پياده پوستې ته ورنژدې شو او په ځان پورې تړلي چاودېدونکي توکي يې وچوول

چارواکي وايي چاودنه له هغې ودانۍ څخه چې د پوځ مرکز او د ولسمشر پروېز مشرف دفتر پکې دى دوه کيلومتره ليرې شوې ده.

راپورونه وايي ولسمشر مشرف د بريد پر مهال په خپل دفتر کې و، خو زيان نه دى ور اوښتى.

بريد د پوليسو په يوه پوسته کې شوى. يوۀ حکومتي چارواکي وويل يو سړى پياده پوستې ته ورنژدې شو او په ځان پورې تړلي چاودېدونکي توکي يې وچوول.

وژل شوي کسان پوليس او يو بايسکل چلوونکى ښوول شوي دي.

د ولسمشر د دفتر وياند رشيد قريشي وويل ښاغلى مشرف د پوځ په مرکز کې په خپل کور کې روغ رمټ دى او چاودنې زيان نه دى ورته اړولى.

دغه چاودنه د تاوتريخوالي د هغې لړۍ برخه ده چې په وروستيو کې پيل شوې ده. د تېرې مياشتې په لومړيو کې دوو ځانمرگو بريد کوونکو د استخباراتي مامورينو پر موټر باندې په بريد کې ٢٥ کسان په راولپنډۍ کې ووژل. همدارنگه، نژدې دوه اوونۍ وړاندې په کراچۍ کې د پخوانۍ لومړۍ وزيرې بېنظير بوټو پر کاروان باندې په ورته بريد کې تر ١٣٩ کسان ووژل شول.

د تاوتريخوالي دا څپه وروسته له هغه پيل شوه چې په تېر جولاى کې په سلگونو پوځيانو په اسلام اباد کې پر سرۀ جومات يرغل وکړ او له خونړۍ جگړې وروسته يې هغه له اورپکو ملايانو څخه ونيو.